郭偉亮跌斷手Broken Man腳趾夾手機

郭偉亮（Eric）不時與太太葉佩雯（Grace）去日本滑雪，去年他不慎跌傷手腳，拗柴要坐輪椅，想不到事隔一年在北海道又跌斷左手腕骨。他在社交平台上載X光片的照片，慘被網民取笑「Broke親有條路」！

Eric昨日接受本報訪問時透露行程第一天就出事：「第一日就斷真係黑到冇得再黑！本來好開心玩到兩次（滑雪），點知落到最容易嗰度見唔到有個窿，Kick到再打咗個觔斗，左手撞落好硬嘅雪地，醫生一照X光就話我唔玩得囉！」他笑言寧願斷骨也不想拗柴，因拗柴要一年才康復，而且比斷骨更痛，今次斷骨預計只需6星期便可康復。夫婦兩人將於明日返港，屆時會再看醫生跟進傷勢。

痕癢最難忍

問到可要太太餵食飯？Eric表示不用，但要對方幫手着衫：「所有嘢都做到，除咗沖涼，因為唔可以濕隻手。幾日冇沖涼，到沖嗰陣就要好慢。」他形容手上的石膏很臭，而且手部痕癢：「我用消毒布抹，但聞落好似發酵咗嘅酒精，總之好臭！但唔排除會繼續滑雪！」左手腫到變豬蹄的Eric還苦中作樂，不停叫人聞他的臭手，又將石膏當碟盛壽司，更練成用腳趾夾手機的「武功」，但笑言很快抽筋，引到太太笑不停。

郭偉亮手腫如豬蹄。	郭偉亮笑言用腳趾夾手機夾到抽筋。	雖然郭偉亮斷手冇得玩，但陪老婆葉佩雯賞雪都開心嘅。

逼老婆聞「臭手」

Grace受訪時則直言肉赤，遂再做「葉姑娘」照顧老公，又指老公左手很臭：「佢逼我聞！一陣酸酸哋嘅味！」為了解決手部痕癢的難題，他們想到用消毒過的筷子：「拮入去撩吓。（擔心嗎？）見到X光片都OK。醫生話佢斷得好靚，應該好快愈合，最慘係冇得玩，唔緊要啦，我哋年年都嚟。」

文：音樂組