彭秀慧舞台劇保持原味

導演彭秀慧孭飛的舞台劇《29+1》宣布下月第9次重演，並踏入第100場，日前她接受訪問，透露今次演出共11場，但劇本方面依舊，未有想過加入新元素：「製作會有少少新嘢，布景同音樂重新設計，其他嘢會保持原有嘅味道，雖然演過咁多場，但好多觀眾睇完都會有癮再睇，每次睇又會有唔同感覺。（會有海外演出？）都好想去，但唔容易，今次多得套電影，吸引到日本觀眾嚟睇，所以到時其中兩場會有中英文字幕。」談到過往演出過無數次，首次演出更是13年前，但彭秀慧指每次演出的心態也會有所不同。