周慧敏擤完鼻涕搵粉絲握手

前晚圈中好友李克勤夫婦、關淑怡、鄭丹瑞、關心妍與老公、翁嘉穗與老公鄔友正、劉兆銘及陳淑芬等齊來捧場，老公倪震亦坐正頭排打氣。演唱會上，Vivian說到信仰時忍不住落淚，要工作人員遞上紙巾，她更在觀眾面前自毀「玉女」形象說：「我可唔可以擤鼻涕？雖然有啲肉酸……一張紙巾唔夠喎，要兩、三張先搞得掂，妝我唔可以唔理，我只想解決咗鼻涕先。」抹完鼻涕後，Vivian笑問：「我依家隻手咁！過嚟握手介唔介意呀？」歌迷當然大呼不介意，而Vivian就很隨意將紙巾拋低走到兩邊觀眾席邊握手邊唱歌。

克勤請教「凍齡」秘訣

至於尾場請來克勤出任嘉賓，兩人合唱後，Vivian主動送抱以示謝意。克勤大讚Vivian「凍齡」厲害，30年前至今未有變過，請教其凍齡秘笈，幾經追問，Vivian說：「真係要講？好肉麻喎！」克勤反問：「有幾肉麻呀？」她即當眾大讚老公：「有老公錫囉。」搞到全場尖叫。Vivian指克勤身子Keep得好，克勤即回句：「我都有老婆錫。」克勤更爆倪震知老婆怕凍，在其化妝間設下十多個暖爐，熱到似火燄山，但笑指嘉賓房就未有此優待。

Vivian抹完鼻涕即與觀眾握手，難得粉絲完全唔介意。	關淑怡（左）特意來撐三位「美少女」場。	Vivian大騷三吋「事業線」。

澎湃宮廷裝成絕響

完騷後，Vivian在慶功宴上受訪，提到身形比開騷前更瘦時，她坦言由開騷前107磅瘦至99磅，但並沒刻意要瘦，只是顧着排練而沒有食欲。身為個唱總監的古巨基爆她將身上「事業線」刻意撥散，Vivian坦言：「係呀，好驚呀，啲衫係件件推，我就件件撥囉。（宮廷裝唔及當年『胸湧』？）唔會再見到喇，嗰次係錯摸，件衫造細咗夾硬拉拉鏈，唔會再有，係『美麗誤會』。」

而基仔在慶功宴台上亦直言心痛Vivian激瘦，卻拿太太兼是Vivian經理人的Lorraine開玩笑：「你成個人體重，等於我太太腰圍。」之後古太被捉上台合照，基仔仍繼續整蠱太太叫她「縮肚」，搞到古太秒閃落台。

文：音樂組