「情人」逝世小肥喊到決堤

歌手小肥將於2月11日在澳門舉行演唱會，是去年Live Show及新歌Project的結尾。完成多首新歌錄音後，他直言辛苦但不捨得：「中間撞咗拍劇，最痛苦係啱啱捱完夜又要錄音、拍MV同宣傳。」問到哪首歌印象最深刻？他認為是《觸景傷城》，指錄音當日非常疲倦：「究竟點先到觸景傷情嘅極致？就係情人死咗，好攞命！成個人投入咗極端嘅感情，喊到收唔到聲！」問到現實中可曾經歷生離死別？他指多年來遇過不少：「阿爸同Sita（歌手陳僖儀）離世，我要幾年先平復到！當Sita走咗一、兩年，突然喺社交平台彈啲嘢出嚟，我再睇落去就會啜泣。」