陳瀅胸壓胡子彤歐鎧淳：我後來先知
陳瀅、胡子彤與女友歐鎧淳前晚出席邵氏網劇煞科宴，提到陳瀅之前被影到開工時胸壓胡子彤，她坦言認識歐鎧淳，不怕對方呷醋。而歐鎧淳則說：「我都係後來先知！」
陳瀅、歐鎧淳、胡子彤、苗僑偉前晚出席邵氏網劇《守護神》煞科宴，陳瀅之前與胡子彤開工時被拍到胸壓對方，問怕不怕胡子彤的女友歐鎧淳呷醋？她說：「唔會！我同佢女友都識。（情人節有咩節目？）冇呀，我依家係單身，今年情人節同新年好近，到時都冇咁覺！今年可以𢭃陳嘉寶封利是，佢嗰封我一定要𢭃，未試過𢭃咁Close嘅朋友利是！」
男友拍親熱戲唔使監場
胡子彤被問到女友知否他與陳瀅有親熱戲時，他說：「佢同陳瀅都認識，報道出咗我都有畀佢睇，大家都知係工作。（想同女友有對手戲？）我唔抗拒，但要視乎係咪真係劇情有需要。」問歐鎧淳有否乘機監場？她說：「冇！之前佢拍戲，我要練水，到我拍戲，佢又要去打波。（佢同陳瀅拍親熱戲，有冇呷醋？）我都係後來先知，有需要監場咩？（你劇中有冇親熱戲？）拖手囉！」
苗僑偉爆黃宗澤嗌息影
而苗僑偉坦言已進入放假Mode，問是否與太太戚美珍二人世界？他說：「會去探仔女，我唔係避年，我好鍾意派利是！（會唔會趕返嚟派利是？）我過完年先返呀！」提到黃宗澤缺席，他笑說：「佢因為攞唔到視帝，話息影喎！過咗兩日又話復出，依家喺內地開工。」而邵氏高層樂易玲指劉心悠、徐子珊抱恙未能出席，苗僑偉笑說：「心悠知道個劇殺青，拍晒冇通告，可以病！」
文：影視組