梁朝偉對空氣做戲考起影帝
梁朝偉和吳君如兩大巨星雖然相識多年，但近年鮮有在公開活動中聚首，昨日君如在新片發布會上笑稱一早忘記上次何時齊齊出席活動，更笑指出名寡言的對方難得變成開籠雀！而一向好戲的梁朝偉就直認今次拍攝難度高，影帝終於被考起！
影星梁朝偉、吳君如、白百何、井柏然、李宇春和柳岩等，昨日在北京出席將於大年初一（2月16日）上映的合家歡賀歲片《捉妖記2》發布會。會上，梁朝偉自言非常喜歡《捉》片第一集，覺得這系列的世界觀非常過癮，所以今次非常樂意出演「電眼賭徒」屠四谷一角，但親身拍攝時，才知道與CG角色演戲有難度：「因為就是對住空氣做戲！」他並透露會在香港過年：「會出去同朋友拜年，不過我不打麻雀的。」又指非常喜歡吃賀年食品，但如有杧果口味就更合他胃口。
囡囡勁冧胡巴
飾演妖怪的君如則笑說已忘了上次跟梁朝偉一齊出席活動是甚麼時候：「今日還聽到他講自己的農曆新年大計，不知幾難得！」她又指囡囡超鍾意小妖王胡巴等CG角色，所以年初一至年初十都是陪囡囡入戲院睇《捉》片：「個女超鍾意胡巴，覺得佢好可愛，今年當然要繼續入場支持。」還透露導演許誠毅曾親手畫胡巴送給她的囡囡，氹得她非常開心。
柳岩長期心心眼
至於有份演出的柳岩以低胸晚裝性感亮相，更含情脈脈望實偶像梁朝偉，長期開着粉絲Mode。另外，雖然《捉》片尚有兩星期才上映，但內地預售票房已破四千萬，氣勢如虹。
文：影視組