洪永城在新劇中以「二撇雞」留鬚造型示人，但新形象被笑指予人好色鹹濕味道，他笑說：「風流同鹹濕係兩個唔同層次。」

無綫藝員洪永城、黃心穎、湯洛雯、謝東閔、郭少芸等昨日在將軍澳電視城為新劇《丫鬟大聯盟》試造型。飾演風流倜儻少爺的洪永城以「二撇雞」造型示人，但留鬚新形象卻予人鹹濕好色之感，難怪被問劇中角色是否樂而不淫？他即笑答：「唔好主觀覺得我係咁嘅人，戲裏面我好正經。」提到新造型的反響？洪永城笑說：「首先會吸收大家意見去檢討，呢個造型之前已經試過幾次，監製覺得有鬚會較為適合，角色係少爺仔，但風流同鹹濕係兩個唔同嘅層次。」

對於早前洪永城在網上為唐詩詠爭視后打氣，獲網民起哄叫復合，一直嬉皮笑臉的洪永城突然認真mode：「有恭喜佢，但未有時間食飯，佢好忙，食唔食唔係最緊要，有心戥佢開心就得。（網民希望你哋復合？）我都睇到好多Comment，同佢係朋友、同事，會Keep住呢個Status。（翻撻無望？）你要我點答你呢句呢？只可以講呢個階段係好朋友。」

而首次孭飛「女一」的黃心穎，與「是非精」姊妹湯洛雯劇中不和兼大打出手扯頭髮。心穎對於孭飛表示不會太大壓力：「如果早一、兩年就會壓力大啲。」湯洛雯即笑說：「依家個位到喇！」談到近日收到粉絲送戒指及花，心穎笑謂被嚇呆：「真係冇收過，大家唔好學，係驚嚇多啲！（馬國明有冇送過？）冇，花同戒指係好嚴重嘅嘢，送前請三思。」

文：影視組