現年55歲的荷里活巨星湯告魯斯去年拍《職業特工隊：叛逆之謎》（Mission Impossible-Fallout，《職工6》）跳天台戲受傷，近日首談牙煙經過，更首播撞碎足踝骨後帶傷拍攝的驚險鏡頭，「搏命」造勢！
「靚佬湯」湯告魯斯（Tom Cruise）不時於《職工》系列玩命，去年拍第6集一場於天台跳到對面大廈的場面時，撞向外牆受傷，最後停工數月，當時未有公開回應事件。近期復工的他與拍檔莉碧嘉費格遜（Rebecca Ferguson）、亨利卡維爾（Henry Cavill）及西蒙柏奇（Simon Pegg）上英國清談節目宣傳時，第一次提及受傷經過，嚇窒全場！他表示：「我當時追緊亨利，原本應該係撞到牆邊，然後自己撐上天台，但就出錯，我隻腳撞咗埋牆。」
年過半百的他自言當時已知足踝位置碎骨，笑言：「但我當時真係唔想再做一次，所以就捱住繼續完成個鏡頭。」節目即場首播劇組拍攝的三個鏡頭，捕捉到他遠距離樓過樓撞向外牆，以及足踝撞傷一幕，意外一刻嚇到觀眾與主持及莉碧嘉都嘩聲四起，西蒙更不斷耍手擰頭表示唔想睇！他又笑稱大家見到靚佬湯帶傷繼續拍時都不感意外，認為是其一貫作風。
靚佬湯表示捱痛完成鏡頭後，再向劇組表示：「碎咗！完成啦！送我去醫院！之後所有人都打電話並安排假期。」莉碧嘉笑說：「我（停工期間）仲搞大咗個肚！」靚佬湯自爆現時未康復，足踝有碎骨但暫時情況良好，要為原定的映期而繼續拍攝，但每日花8至10小時接受治療。他又自爆親身拍攝驚險的直升機低飛場面，亨利也半天吊，而懷有6個月身孕的莉碧嘉亦挺肚揸槍上陣，各有各去到盡！
文：外娛組