現年28歲的英國女星莉莉占士（Lily James）於《黑暗對峙》（The Darkest Hour）飾演邱吉爾私人秘書，她笑言為演出更傳神，特意去上打字班，更已經成為打字高手！
近年巧合地有多套講述鄧寇克戰役的電影，先有基斯杜化洛倫（Christopher Nolan）執導的《鄧寇克大行動》（Dunkirk）講述前線慘況，後有女導演Lone Scherfig執導的《編寫美好時光》（Their Finest），以女性角度描寫大後方。最新一部《黑暗對峙》就圍繞關鍵人物英國首相邱吉爾，加利奧文（Gary Oldman）精湛演出成為焦點，但飾演其秘書Elizabeth Layton的莉莉，在男人群戲中還是十分搶鏡。
莉莉受訪時表示其戲份在今時今日女權浪潮中別具意義：「當大門喺你面前關上，你好難唔覺得被隔離。喺當時，女人可以獲得戰爭中重要嘅職位，係非常有啟發性。然而戰後我哋反而倒退，又失去咗方向。」為演活角色，莉莉透露她除了閱讀Elizabeth的回憶錄，更上了6個星期打字班，笑言：「我變到相當勁，而我好享受可以透過咁技術性嘅嘢，去連接Elizabeth Layton。」
從演藝學院畢業後，莉莉憑《唐頓莊園》（Downton Abbey）走紅，之後擔任過迪士尼的灰姑娘，又在《寶貝神車手》（Baby Driver）做美國女侍應，她表示：「我已準備好突破自己，試好多新角色。」她接下來將於《媽媽咪呀！開心再嚟》（Mamma Mia! Here We Go Again）飾演梅麗史翠普（Meryl Streep）角色的後生版，歌舞連場，她直言超級興奮：「你好難唔被完全吸引，瘋狂地跳舞！」
文：外娛組