「藍帶廚模」蔣怡用傷痕平反
自從在倫敦考獲法國藍帶廚藝學院最高榮譽文憑後，名模蔣怡搖身一變成為「藍帶廚模」，立志分享廚藝，但原來有人覺得她只是扮下廚，因為身形苖條而欠缺說服力，令她大感無奈！
蔣怡（Coco）是藝人又是飲食節目主持，同時又是太太及媽咪，可謂身兼多職。她與珠寶設計師老公翁狄森育有4歲女兒翁容，工作過後回到家中，她便做回家庭主婦，跟一般主婦一樣照顧家人。由於她廚藝一流，能炮製中西佳餚，烘焙技術又耍家，故閒時便以此手藝賺外快，她說：「早排媽咪生日，前一晚諗不如整個生日蛋糕，但又冇雞蛋。凌晨12點開工，整咗個好簡單嘅朱古力蛋糕，用玫瑰花裝飾，個個食完都覺得好好味。過咗兩日，囡囡學校搞Party，我整咗個熊仔造型蛋糕，係海綿蛋糕加朱古力，上面裝飾咗啲卡通蝸牛仔同甲蟲仔，因為個蛋糕係畀嗰個月份生日嘅小朋友，要喺面放9個小朋友嘅名，但蛋糕得6吋，於是我用咗9個Macaron寫名，結果大受歡迎！」
美人魚蛋糕氹囡囡
Coco自此收到不少家長的訂單，當中奶奶更是大熟客，經常向她落Order訂蛋糕送朋友，她笑言兼職生意非常不錯！而最近她的最大「成就」，是為囡囡4歲生日炮製的生日蛋糕，她說：「囡囡想要個美人魚造型蛋糕，要求咗我一年，今年終於達成佢嘅願望，但做到嘔血，花咗兩日先做好，因為日頭忙湊女，只可以夜晚開工，喺蛋糕面整咗啲海洋生物，好似八爪魚同魚仔，味道好好，我覺得賣相麻麻，不過啲人就話好靚。」
身為大廚的Coco，覺得焗製蛋糕好簡單，只是裝飾很花時間，但她明言無心向烘焙方面發展，烹調才是她的興趣：「我唔係烘焙師，我係廚師，焗蛋糕其實冇創意，只係跟住步驟做。」近月她落實做直播煮食節目，她興奮地說：「其實不嬲都有拍煮食片，但無論我拍幾多，有八成人都唔信我識煮嘢，啲人以為係電視效果，以為做咗手腳，所以我覺得直播比較適合我，所有嘢都係真實，仲可以日日煮。」
被質疑「造假」勁無奈
Coco認為這些誤解與其外表有關，她承認自己的外貌不像會去街市，也不像會切菜，更有人覺得她身材瘦削，應不愛吃東西，對此她大感無奈：「大家睇吓我雙手，我對手有好多做菜時留下嘅傷痕，人哋嘅睇法我改變唔到，並唔係想去說服大家，只係想將自己嘅興趣分享畀大家。」
Cooking Mama快樂廚房
Coco不時帶囡囡出埠享親子樂，又會為她炮製造型吸引的美點及蛋糕，見到囡囡食得開心，她便心滿意足！
初與TVB合作融入「大家庭」
蔣怡與無綫合作拍攝飲食節目，在big big channel推出，原來這是她入行以來與無綫的第一次合作，早前出席《群星拱照big big channel》節目，更是她首次踏足電視城，她笑言感覺很新鮮。電視城對她來說有點陌生，但裏面見的人都是熟悉的面孔，令她有回到大家庭的感覺。今個月她會在big big channel推出音樂廚房節目，將飲食以多媒介方式分享。
文：名人組