馬國明失落視帝踢波發洩
失落「視帝」的馬國明，日前相約朋友踢波發洩，換上「19」號球衣的他在球場上跑來跑去，始終戒不掉「天然呆」的習慣，見他不時口擘擘，呆呆地望着隊友等接波，耗盡精力的他，完場便揸車返屋企繼續做宅男。
被封為「民間視帝」的馬國明，在早前的《萬千星輝頒獎典禮2017》被視為大熱，不過「視帝」最終成為王浩信的囊中物，馬國明僅獲得「最受歡迎電視男角色」安慰獎，「視帝」再一次擦身而過。
着鴛鴦色波鞋落場
日前趁着不用開工，馬國明再次到銅鑼灣做Facial護膚，逗留約2小時，扮完靚靚即往附近停車場取車，然後駕車前往沙田石門，泊好車後，戴帽的他手持旅行袋步往足球場會合一眾波友，期間有停車場保安向馬國明打招呼，他亦禮貌地笑笑口揮手示好。進入球場後，馬國明先往更衣室換衫，未幾穿上全副裝備，換上黃色「19」號球衣、穿鴛鴦顏色波鞋步出，並到一旁拉筋做熱身。
做完Warm Up，馬國明便跑進球場「自動波」埋位，更不停走來走去，不一會已汗流浹背，期間未有波到時，見他一副「天然呆」表情望住個波等隊友交波。踢了兩個多小時後，馬國明發洩完便往取車離開，沿途經觀塘油站入油，之後返回太古城寓所，未見約會女友黃心穎。另外，心穎上載了戴上哈利波特眼鏡及頸巾的照片，擺明是哈利波特粉絲。
文、攝：追蹤組