出爐視帝王浩信得獎翌日趕拍劇之餘又出席活動搵真銀，期間重提當年連一碗芝士麵也吃不起的艱苦日子，又透露得獎返家獲太太攬錫祝賀，問到會否嗌加價即說：「最緊要合理！」至於大熱倒灶的馬國明未感失落，還獲女友黃心穎打氣及高層樂易玲讚好男人。

《萬千星輝頒獎典禮2017》中勇奪「最佳男主角」的王浩信，昨日為無綫新劇《兄弟》外景開工後，隨即趕到中環出席活動，期間笑言未有因得獎而加酬勞。談到昨晚得獎後返家未有慶祝，他表示有跟太太陳自瑤閒聊幾句，問到對方有否攬錫祝賀，浩信說：「都有！不過屋企嘅嘢唔好講咁多。佢喺屋企睇我攞獎，我想低調啲，佢知係我多年夢想，都戥我開心。我媽媽帶咗囡囡嚟現場冇人認得，我想囡囡藉此上一課，知道努力係有回報。」

浩信得獎一刻發表感言，重提當年與C君窮到連芝士麵也吃不起，銀行存款長期雙位數，升呢當視帝之路相當崎嶇！他受訪時說：「嗰次我有發自己脾氣。（呢段日子維持咗幾耐？）一、兩年，但有時都會有啲收入嘅，好彩屋企人當時好照顧我，唔使我攞好多錢返去。（依家買得起成間芝士麵舖？）唔得住，所以今日咪嚟示範炒蛋囉！」問到會否調整薪酬？浩信說：「最緊要合理，交畀公司處理。」

對於汪明荃前晚代所有同事「反映意見」，希望有人工加、多休息時間及減少「山頭文化」，浩信說：「大家聽到加人工梗係大反應，可以多啲休息時間都係開心嘅。不過我唔明咩叫山頭文化，但多啲演員嘅配套及支持係好嘅。」

賽前另一熱門馬國明雖敗猶榮，他表示對失落視帝未感失望：「反而好開心攞到兩個獎。（網民戥你唔抵！）好明白鍾意我嘅人會戥我唔抵，感謝大家支持。（攞『最受歡迎電視男角色』係安慰獎？）唔係！係對我角色嘅肯定，係大獎嚟。」他又自言與無綫的合約尚有一段時間，未有聽聞續約可以換獎。提到好友唐詩詠勇奪視后，他說：「好替佢開心！佢攞獎我都眼濕濕。」女友黃心穎則於社交網站留言恭喜：「他的演技不需要獎項來肯定的，看到你們的支持我相信更寶貴。」

另外，前晚《萬千星輝頒獎典禮2017》收視創佳績，錄得29點收視，台前幕後計劃下星期舉行慶功宴。高層杜之克於頒獎禮後透露，去年有八部劇集於內地主流平台播出，希望今年可以增加到十部，更希望衝出內地，台灣、新加坡及馬來西亞等地都有機會播放無綫劇集。樂易玲則讚馬國明「好乖、好男人、好丈夫」，又補充：「TVB藝人好福氣、好強大，大家繼續一齊追夢。十幾年後做蜚聲國際嘅大明星，絕對有可能係你哋。」

文：影視組