陳曉東認情路作孽：拍咁多拖做咩？

陳曉東早前頻頻出席香港的活動及節目，為2月10日在澳門威尼斯人舉行的第一場世界巡迴演唱會造勢。雖然行程非常趕急，但他並沒有不習慣，笑指自己是超級工作狂。提到多年前多次入紙紅館申請開騷，東東透露入行第二年本來有機會，但結果沒成事：「其實我一啲都唔急，最緊要係準備好先，嗰時我覺得自己唔係好Ready，好多嘢唔確定。當時我仲係個中學生，中學生點喺紅館開演唱會？」他認為初入行難免會緊張，不過現在已完全不同，很慶幸在澳門開第一場巡唱，期待快點到香港站。

生得靚仔又點？

由當年的情歌王子，到現在為人父親，東東的樣子幾乎沒變過，他笑言感情路上有很多得着：「當你經歷一啲感情關係，就會發覺感情嘅秤係公平嘅。無論生得靚仔或醜樣，總有啲時候係你傷害咗人，又總有啲時候係你被對方傷害。」他覺得緣盡就會分手，很想回到最純粹的感情狀態：「拍咁多拖做咩？唔好再作孽啦，何苦今次我傷害你，下次又到人哋傷害我！講到底係要互相理解，唔好淨係顧自己，或者因為對方鍾意自己先鍾意對方。與其一路重複，不如諗清楚自己想點先。」

乖老婆謝絕應酬

能夠令東東「回到最純粹的感情狀態」，太太王妤嫻必有其吸引的地方，東東笑言：「成日講呢啲好肉麻，總之佢就好啦！」提到另一半出身於家教甚嚴的中醫學世家，東東即讚不絕口說：「佢係護士，又做過平面模特兒。做平面模特兒好多應酬，佢全部拒絕，人哋叫佢着少啲佢都話唔得，真係一個好乖嘅女仔。佢嘅家庭環境令佢好堅強，好識顧及人哋嘅感覺。」東東自言被寵大，沒有太太這種特質：「結婚之後我被佢影響好多，呢樣嘢係佢教番我轉頭。」

文：音樂組

髮型、化妝：Jenny Man

服裝：Dunhill

場地：金域假日酒店Osteria意大利餐廳