黎瑞恩食素減15磅紅館勁舞

歌手黎瑞恩（小恩子）昨日為4月5日及6日《黎瑞恩感恩有你演唱會2018》舉行記者會，以民族風打扮現身的她在台上講到演唱會主題「感恩有你」，她指之前在樂壇出出入入，感恩歌迷一直支持，小恩子更預告今次會跳舞，笑言：「我跳舞好叻，但從來未表演過。」期間司儀宣布兩場演唱會預售門票已爆滿，並指演唱會部分收益會用作買洗腎機幫助腎病患者。

預售爆滿成身飛債

問到演唱會會否加場？小恩子說要等公司安排，但有很多飛債纏身：「今次個個朋友都打嚟話留飛，反應好勁、好開心，因為我都太耐冇喺紅館，對上一次5年前係喺會展，紅館就係16年前。」她又透露要為個唱減肥：「我1月1日開始食素，農曆新年快到，年糕都要忍口。（減咗幾多磅？）5、6磅，人瘦咗輕鬆啲。（打算減幾多磅？）我哋咁嘅年紀唔應該太瘦，諗住減15磅，但好羨慕大家姐（周慧敏），佢本身107磅，減到101磅，搞錯呀！我做女嗰陣都冇試過。」

周慧敏	黎瑞恩事隔16年再上紅館舞台，由於反應極好而直豎拇指。

囡囡做後盾教跳舞

講到跳舞部分，小恩子表示同事恐嚇她會跳得好勁，下月便開始練習，她會盡力跳，由於囡囡喜歡跳K-pop舞，小恩子笑言：「佢叫我唔使驚，實會教我。（叫埋佢上台表演？ ）唔啦，佢今個月尾就要返去外國讀書，4月先返嚟睇演唱會，所以冇時間練。」之前她做了切除腹部腫瘤手術，小恩子坦言現時身體OK，不怕跳舞會整親傷口。嘉賓方面仍保持神秘，只透露確定了兩三個前輩級的嘉賓。

文：音樂組

攝：吳文聰