爾冬陞暗示意外誕女：起初接受唔到！

導演爾冬陞（小寶）、惠英紅與林家棟昨日到紅磡，出席《ViuTV x 第37屆香港電影金像獎頒獎典禮》記者會，宣布ViuTV成功奪得免費電視的獨家直播權，金像獎協會董事局主席爾冬陞否認與無綫合作不愉快：「前兩屆好精彩，但呢個係政府資助要投標，價高者得！」

小寶被追問「秘做老竇兩年」，他坦言感受甚大：「我媽未過身前，我已經決定唔要小朋友，想追求自由，窮一生想掌控自己命運，但發覺做唔到！我對前妻羅曉文有遺憾，行唔到最後。新生命開始嗰陣，我接受唔到同震驚，但既然嚟到、解決唔到，就要面對、反思同處理，人生意義係乜？好迷惘！可能上天想畀責任我，令我有新體驗。睇住個女令我有驚喜，重新學習好多嘢，佢25個月大，講出嚟係因為依家大啲，我都會帶佢出去玩，始終都要講，個女揸外國護照，年底會返香港讀書。（女友係傳過緋聞嘅內地女演員王婷？）一定唔係！係圈外人，但我唔想曝光，佢喺內地住。（年輕過你好多？）留番下集先講啦！」

小寶貝女曝光	爾冬陞與女兒嘅BB樣似到餅印一樣！	惠英紅與林家棟講到明唔會投票畀自己，以表公平。

林家棟想做老竇：Dry到爆！

小寶哥哥秦沛接受電話訪問，指家人都戥弟弟開心：「細路女好乖、好得意。（幫小寶守咗兩年秘密？）冇話守唔守秘密，呢啲佢私人事，唔會對外周圍講。（見過小寶女友？覺得佢點？）呢啲留番佢自己講。」

黃心美以性感打扮擔任記者會主持。

大會宣布由ViuTV直播《金像獎》的盛況。

至於惠英紅與林家棟恭喜小寶做老竇，惠英紅說：「我同小寶講，仔細老婆嫩，唔可以咁放肆！」家棟則說：「我頭先至知，之前開會冇人講過、提過，冇人知！（幾時到你爆出做咗老竇？）我都想爆吓，Dry到爆就有！」兩人又表示有份參與金像獎提名投票，但為表公正，決不會投票給自己。

文：影視組