劉佩玥沙田友 城門河運動場回味甜蜜腳印

城門河父母拖手愛回家

Moon從出世到入行做藝人都居於沙田，最著名的城門河是她的蒲點之一，因為無論返學還是放學，城門河都是必經之路，亦與前男友有不少甜蜜的回憶！她說：「以前放咗學，佢練完跑之後，我哋就行過去城門河嗰邊拍吓拖，再經城門河行返過對面返屋企。」

Moon又指以前與家人晚飯後，會與爸爸、媽媽及細佬齊齊在城門河邊散步邊回家，更大爆爸爸媽媽的拍拖經歷：「佢哋咁多年嚟都會喺城門河散步，食完飯就日日拖手由城門河散步返屋企，我同細佬就一邊玩一邊同佢哋行返去。」

大會堂踩板傾偈好地方

沙田市中心連接沙田大會堂的一大片空地就是Moon小時候放學必到的蒲點！她笑謂小時候零用錢不多，放學後與同學去玩又不想花錢，就會一大班人到這條長樓梯坐低傾偈，有時候又會在這裏傾功課，肚餓就入商場搵美食，她說：「其實到依家都周不時會嚟，因為呢度有一大塊空地，我最近學緊踩滑板，呢度就好方便我練習啦！」

放大圖片

放大圖片

茶餐廳收平啲人情味滿載

問到最難忘的食肆，Moon就走入一間位於瀝源邨的舊式茶餐廳，見她到茶餐廳門口就與店員熱情打招呼，一坐低連餐牌都不用看就點菜！雖然吃的只是普通的沙嗲牛肉麵及凍奶茶，但Moon都吃得津津有味：「呢度係我讀中學嗰陣最常嚟嘅餐廳，差唔多日日都嚟，以前讀書嗰陣冇咩錢，老闆都會收平我哋少少，食嘅雖然係好簡單嘅茶餐廳食物，但係充滿住人情味！」

沙田運動場陪鐵人舊愛練跑

沙田運動場毗鄰禾輋，位於Moon所讀的中學對面，所以也成為熱門蒲點，更是她與中學時期的男友拍拖勝地！Moon透露前男友喜歡玩三項鐵人，放學後經常到運動場練習，Moon就做「跟得女友」！她說：「因為我好鍾意寫嘢，好需要靜靜哋諗吓嘢，有時候放咗學，佢要練跑，我咪坐喺觀眾席等佢，一邊等一邊諗吓有咩題材可以寫！」Moon笑言與前男友都是「純純的愛」，不會四周圍去玩去拍拖，沙田運動場反而成為兩人的拍拖勝地，更笑指：「冇(口架)，以前細個唔識拍拖，大家都係放學相處吓！」

放大圖片	放大圖片	放大圖片

母校操場寫作被誤(目及)仔

Moon從幼稚園到中學都在沙田讀書，令她印象最深刻的就是中學階段，就讀浸信會呂明才中學的她，被問到最常在學校做甚麼？她表示喜歡寫作，故放學不是坐在沙田運動場，就是坐在學校的籃球場找靈感，卻被同學誤會她是為了在籃球場(目及)仔，她笑說：「因為我鍾意喺啲冇咁侷促嘅環境下寫作，有時睇住啲同學仔打波，好自然就會有靈感，初初好多同學以為我喺操場坐喺度係為咗睇男仔，後來我攞咗獎，佢哋先信我坐喺操場係為咗寫嘢！」