陳敏之成面蛋糕慘被大婆糟質

夏雨、李司棋、陳敏之、唐文龍、胡琳等無綫劇《溏心風暴3》演員齊齊出席宣傳活動，眾人上演短劇，李司棋作狀摑敏之後，唐文龍指要送生日蛋糕給「小三」敏之，但被「大婆」胡琳一手搶去，並質落敏之塊面上，敏之上半身慘食蛋糕，當場發呆！而夏雨又即時「正爸」上身，拎起奶茶潑唐文龍兼爆粗：「賤狼，你做咩搞我個女？X街！」唐文龍慘被潑到成身奶茶。胡琳後來補鑊，急急腳拿起紙巾替敏之抹去臉上的蛋糕，唐文龍更笑謂驚喜：「呢杯奶茶係我十幾年嚟飲過最甜嗰杯！」最後，大會推出一個大蛋糕，為即將生日的敏之提早慶生。

胡琳：撻上去質多下

本月17日牛一的敏之直言好驚喜，事前不知情的她笑謂多謝監製送這份生日禮物：「我真係呆咗呀，不過我覺得唐文龍慘啲，佢成身都係奶茶！」談到前晚的劇情，李司棋怒摑她，她指事前已叫李司棋真摑，並一Take過打兩巴，老公亦大讚她做得好。至於胡琳被問可擔心敏之生氣？她說：「起初都驚，我怕整親佢。」唐文龍笑指胡琳已留手，只將蛋糕撻在敏之面上，胡琳笑說：「唔係o架，我撻咗上去之後有質多下，我係擔心個蛋糕跌落地！」

放大圖片	陳敏之又畀李司棋「摑」！

「以為玩……點知係真！」

唐文龍則揚言不知情並笑指「好應」，至於在劇中被潑奶茶幾多次？他說：「拍劇都係一次啫，夏雨啲『球技』好厲害，但之後要補大頭，啲奶茶乾咗要由頭淋過！不過今日杯奶茶就大杯啲！我以為玩吓咋，點知係真！」談到夏雨爆粗，唐文龍指他連戲：「係劇入面嘅情緒，我個角色係應該被鬧，鬧得好！」

唐文龍遭夏雨潑奶茶後，仲被爆粗鬧。

唐文龍（左起）、胡琳、夏雨等為陳敏之慶生。

文：影視組