曹敏寶4月嫁科學家努力追B
前港姐冠軍曹敏莉的歌手胞妹曹敏寶（Abo）突傳婚訊，不過她的真命天子並非曾傳緋聞的同性密友Mag，而是年長5歲的科學家男友Albert，準新娘指同性緋聞是誤傳，跟準老公是緣分，兩人有夫妻相乃天作之合！
現年31歲的歌手曹敏寶早前才宣布轉戰影壇，原來恨嫁心比事業心更強，前晚她宣布將於4月下嫁拍拖快一年、現年36歲的科學家男友林潤生（Albert），二人已訂婚，會在香港、美國舉行婚禮，好友周美欣任伴娘，Abo成為繼前港姐陳倩揚後，圈中第二位科學家太太。
凹凸配已訂婚
Abo受訪時拒透露和Albert相識的經過：「想留啲秘密畀自己，我哋係朋友介紹，係緣分嘅安排，好多人話我哋好似樣，Albert鍾意我哋性格一凹一凸，好夾。」她分享被求婚的過程，承認被文靜的他誠意打動：「佢唔多講嘢，因為佢個腦快過把口，但同我求婚時，準備咗啲心意同講咗好多嘢，話會照顧我同家庭，係有膊頭嘅人，我好感動，喊到豬頭咁，之後搞咗個訂婚Party同朋友分享。」
Albert曾於大學任教，近年創立自己公司搞科研，Abo笑指：「佢家陣搞緊人工智能語音，目標好宏大，想做到馬路上啲車都無人駕駛。其實科學家都係普通人，只係一份職業啫。」談及其家姐曹敏莉老公為半億身家的金融才俊，兩姐妹都嫁得好，Abo說：「嫁科學家唔覺得特別威，我都有叻過佢嘅地方，哈哈。姐夫都係一個好叻嘅人，佢同Albert傾偈時，我同家姐都插唔到嘴。」
密友Mag是朋友
曾跟富貴同性密友Mag翹手行街傳出緋聞的Abo，指跟Mag一直都是朋友，至於結婚可會請Mag？Abo說：「我仲未搞賓客名單。」婚後她會火速造人，因3月她就32歲年紀不輕，但否認因「雙喜臨門」趕住嫁：「連我醫師都催我快啲生，不過真係未有，我想結婚時靚埋一次先，生BB要有計劃。」
文：音樂組