陸永嫂「換命翼尖」氹老公開心

陸永的太太Reina前晚在社交網上載與兩名女性好友的合照，稱興高采烈去元朗食糖水兼買外賣回家，誰知準備開車之際突然肚痛：「肚痛到個人有啲不知所措，唔係想去廁所，但係都行去睇吓個公園有冇廁所，痛到成頭冷汗，突然冇力，眼前一黑跌低落地下，之後撳住個肚標眼水。」

死頂自駕返屋企

她的朋友打算報警求助，卻因為不熟路而說不出地址，幸得兩位熱心途人幫手，還有位小姐遞上紙巾給Reina抹汗：「朋友唔識着車閂番全車車窗，又唔識鎖車，多得隔籬車司機好好心，幫我搞掂架車。上咗救護車後，我又唔痛喇，做完簡單檢查後，我要求落車，唔想去醫院等幾個鐘都未見到醫生呀！但係仲係冇乜力，三個好好人嘅救護員話如果唔痛，可以休息多陣，唔去醫院都得嘅。」最後她沒有去急症室，又不想花個多小時等代駕，就自行駕車離開。事後家人逼她到私家醫院看醫生，不過她說：「我都自己返到屋企啦，仲入咩醫院？早啲瞓好過啦！」一班網友都留言表示擔心，更叫她應該為了家人着想去做身體檢查。

有網友勸Reina為着老公同囡囡要小心身體。	Reina（前者）與兩名好友相約食糖水。	太太忍痛送外賣，陸永坦言被「換命翼尖」感動。

疑似飯後腸抽筋

陸永亦上載雞翼尖的照片，並留言是「用命換來的翼尖」：「從前有一個人去買翼尖，買咗之後肚痛到暈低，叫咗白車去醫院，但呢個人為咗將翼尖帶返去畀佢老公食，佢決定唔痛喇，自己揸番車返屋企，將翼尖送到佢老公面前，佢老公話辛苦晒，好味道！」

陸永昨日接受電話訪問時，坦言為雞翼尖感動，但形容情況沒那麼誇張，估計是太太飯後腸抽筋：「接到朋友電話真係好擔心，即刻出去搵佢，不過出到去佢已經冇事，仲上番自己架車，我就送佢返屋企。」他指太太未試過腸抽筋，但認為與食物及曾經小產沒關係，並已叮囑對方小心飲食。

文：音樂組