捱義氣唔收片酬 陳浩民嘆好友耳仔軟
林子聰投資電影失利，血本無歸，義務參演的好友陳浩民昨日接受訪問時亦嘆對方遇人不淑：「戥佢慘，我欣賞佢演戲、執導同寫劇本都得，但缺點係耳仔軟，希望佢經一事長一智。」
陳浩民表示為了該片推掉幾齣劇，每部動輒逾千萬酬勞，但為幫兄弟冇計：「知道曾經有投資者話想加自己演員，換走我，但肥仔聰堅持要我拍，寧願唔要嗰筆錢，佢好有義氣！到之後啲資金一直未到位，原本我係有片酬，咁我就話唔收啦！繼續拍啦！」他感慨上映的影院數目太少，內地上映三日只收幾十萬元，實在差強人意，亦因此沒有片酬可給他。
張繼聰感遺憾
此外，張繼聰表示一直欣賞肥仔聰多才多藝：「佢好好，畀足片酬我，亦喺佢身上學到嘢。（知唔知佢蝕大本？）唔太清楚，票房失利我都覺得好遺憾。」
