肥仔聰賣埠遇騙徒 300萬渣都冇

肥仔聰近年事業發展不俗，演員、導演工作密密做，前年更為狂收34億人民幣的周星馳電影《美人魚》擔任執行導演，不過風光背後，原來同年卻受過很大打擊。他有份投資兼執導，張繼聰、台灣歌手蘇見信（阿信）、陳浩民及內地女星周奇奇演出的電影《笑林足球》，因電影有部分投資方未有履行承諾將資金到位，令到電影要縮皮，內地電影宣傳方面做得不好，排片比例又少，令到電影在內地只上了數日便落畫，票房慘淡，再加埋賣埠去東南亞時，遇上中介人騙徒收錢後竟然一去冇回頭！在各單位多重失利下，其投資當然凍過水，不僅連一蚊都賺不到，肥仔聰與另一位投資者共慘蝕2千多萬。

慨嘆對唔住班好友

本報就此事求證肥仔聰，他無奈承認事件，並透露為該片投資3百萬元，換來蝕到入肉經歷：「呢套戲我十年前開始寫第一稿，好鍾意個劇本，籌備到拍攝用咗一年，個個演員都盡心盡力，張繼聰同阿信為套戲仲去健身、節食同練波，阿信更加由唔識踢波，到一腳彎過人牆入網，仲為套戲寫咗首好好聽嘅主題曲！」肥仔聰續稱，好友陳浩民更不收分文以示支持：「我諗住等有收益嘅時候，分番少少畀佢，依家都冇得畀，變咗白做，都非常唔好意思！」

而曾演出內地劇集《琅琊榜》飾演宮羽的內地女星周奇奇，今次亦是畀面答應演出，在片中飾演美麗硬淨的女班主，肥仔聰大讚奇奇靚女兼表現不俗，亦非常配合劇組，就連負責該片攝影的杜可風也忍不住讚她。

最大投資者患抑鬱

至於該片最大投資者阿Wing接受本報訪問，透露為此事患上抑鬱，她說：「我告上法庭，法庭判對方必須畀番賣埠嘅錢我，但到依家都未收到，件事令我賣咗兩層樓同患上抑鬱，真係好痛，唔明點解啲人咁衰，對方仲喺呢個圈做，我公開呢件事係想提醒同行，小心唔好畀人呃！」

文：影視組