寫足一年情信翠如溝仔食檸檬
無綫劇集《溏心風暴3》演員夏雨、李司棋、米雪、關菊英、黃翠如、陳敏之、阮兆祥、莊思敏、陳智燊等前晚到將軍澳出席祝捷慰勞宴，慶祝劇集在內地騰訊視頻播放量突破10億。
劇情最近講到黃翠如主動出擊咀黃宗澤卻被嫌棄推開，令她勾起讀書時追男仔一年的失敗經歷，她笑說：「讀中學寫過好多封情信畀一個男仔，追咗佢成年都追唔到，可能我唔夠吸引，同埋寫得太多無聊嘅情信畀佢，後來個男仔回信拒絕我，話已經同第二個拍拖，當時自己覺得失戀，傷心咗成年，之後冇再試過追男仔。」她又指與男友蕭正楠亦會寫情信談情，但笑言是低能、廢話情信，信中沒有愛亦不肉麻。
硬咀「性無能」黃宗澤
而下周《溏3》劇情講到黃宗澤因勾義嫂被綁架，逃走時不慎碌落山撞樹半身不遂，有翠如照料幸免變癱，但變成性無能，失去寄託的他借醉咀翠如，雖然終於「咀得成」，但卻嚇得她眼凸凸。
另外，慰勞宴上，陳敏之恨攞獎恨到出口，表示為角色付出很多，希望再奪女配角獎，又表示若攞獎不介意帶兒子上台。而莊思敏劇中反白眼鬧人成功出位，自言是「反白眼女神」，更被朋友要求她表演：「見過人咁樣鬧人所以加咗落個角色，不過醫生話反白眼對眼睛唔好，小朋友唔好學。」
文：影視組