Chilam慘變助手 幫薛凱琪着鞋
藝人張智霖（Chilam）與薛凱琪（Fiona）首結片緣即火花不斷，日前開工更互相玩踢爆，Chilam自爆近日「降呢」為Fiona助手，原來Fiona的新助手亦叫「Chilam」，Chilam每次聽見Fiona嗌「Chilam」，即搞笑上前為她斟茶遞水兼着鞋。Fiona亦唔執輸，指Chilam開工時扮導演，經常以手機拍攝無聊片。
Chilam和Fiona日前為網劇《蝕日風暴》開工，拍攝一場查案戲份，惟現場沙塵滾滾，二人一Cut機即把握時間戴上口罩。劇中Chilam暗戀Fiona，惟因好兄弟王陽明而讓愛，不過他們同聲指現實中絕不接受讓愛。
錯失搵銀機會
對於首度結片緣，Chilam指劇組上下均相處融洽，但自爆慘成了Fiona助手，他說：「佢每日都叫『Chilam』遞杯水嚟！』成日都叫『Chilam』點點點，我惟有照做啦！仲有幫佢着吓鞋咁。」在旁的Fiona即呼冤謂：「因為我個新助手都叫『Chilam』嘛！哈哈！」聖誕及除夕均開工度過的Chilam，直言為了該劇損失不少搵真銀機會，更笑謂：「節日喺廢墟度過真係好沮喪。（老婆袁詠儀網上晒聖誕禮物，但唔見佢最愛嘅名牌手袋，係咪已經碌你卡買咗？）真係唔知，我聖誕都冇人送禮物畀我，佢同個仔就去咗日本玩，真係好無情。」
扮導演拍片
Fiona則爆Chilam於鏡頭後經常拍無聊片：「佢好鍾意扮導演，用手機拍啲無聊片，仲做埋剪片然後放上網o架。」Chilam聞言即反擊：「係我咩？拍無聊片嗰個係Fiona，拍完叫我放上網囉。不過我都有興趣做導演，但就要長時間準備，依家未實現到住。」Fiona亦透露片中不乏打戲，現時已打到左手乏力，手指也扭傷，奈何一直未有時間睇醫生：「之後都要同梁靖琪（Toby）對打，但套劇雖然打得辛苦，但都幾鍾意做打女，因為有型兼動作優美嘛！」
文：影視組