陳奕迅誤墮騙局

陳奕迅笑言墮入導演谷德昭的騙局！

由陳奕迅（Eason）、李榮浩、李一桐及劉浩龍等主演的電影公開製作花絮，Eason於片中有不少吊威吔場口，他趁機投訴誤入導演谷德昭的騙局：「起初接到劇本係演一個拍戲唔會親身上陣嘅超級動作巨星，係一個成日扭計嘅小朋友，好有趣、好好玩，一心諗住放開懷抱演繹呢個無賴巨星嘅角色。開拍之後點估到呢部原來係真動作喜劇，而我呢個『動作巨星』真係要大打出手，開拍前要練打！真係好大突破！」

巡迴騷後似有「產後抑鬱」

雖然親身上陣拍攝動作戲，但同時亦令他獲益良多，亦謂今次拍戲絕對是體力大挑戰：「要學習點樣喺鏡頭前打得靚一啲都唔容易，仲要記住所有招式，擋、拍、攻、守，全部好有學問。」他又特別多謝動作導演洪天祥及有份演出的陳國坤同Chris Collins：「有好嘅對手一齊研究非常重要。」

陳奕迅（右）與李榮浩係咁跳起，少啲體力都應付唔到！	陳奕迅（左）演「動作巨星」，與Chris Collins大打出手。	陳奕迅在戲中要吊威吔，又要應付動作場面。

Eason又謂可能因為之前兩部電影都係比較沉重，初時不是太有信心再演喜劇，但谷德昭給他很大信心，非常感激對方給他機會再拍喜劇。而谷德昭笑言Eason忙完巡迴演唱會後，好似有「產後抑鬱」一樣，希望角色可以令Eason開心番，不要浪費他在喜劇上的感染力。

文：影視組