張振朗撐拐杖：驚影響生育能力

張振朗平安夜認真倒霉，與謝東閔及一友人途經屯門某鄰近海邊的商場時，商場天台突然有三個大型帳篷跌落街壓中振朗，膝頭、背脊受傷的他躺在地上痛得未能起身，其後送院求醫，他上載了一張黑白相，並說：「昨天過了一個很特別的聖誕夜……」

振朗接受電話訪問時說：「好彩唔係擊中塊面，我已經避開，如果冇避開就仲大鑊，背脊、腰、膝蓋都傷咗，好痛，照咗X光，好彩冇骨裂，但連彎腰都痛，一個星期後再覆診。」謝東閔表示他們拍畢劇集《堅離地愛堅離地》後到附近散步，他亦險中「頭獎」：「好彩烏得切身，兜頭撞中真係命都冇！」

三個大型帳篷跌落街的事發意外現場。	陳芷尤	張振朗

最擔心遭易角

昨午振朗負傷與蔡思貝、劉佩玥及何廣沛到上水匯出席《聖誕星空夢派對》，撐拐杖到場的他自爆戴了腰封令他腰板挺直，但不時面有難色似在忍痛。他說最擔心是影響新劇《包青天再起風雲》的拍攝，飾演展昭的他有大量動作場面，會與監製研究如何處理。問到可會擔心被易角？他承認擔心：「為咗個角色操練咗幾個月，唔想化為烏有，如果易角會好遺憾。」他又認為事件應有人要負責，問會否追究？振朗說：「再研究，先處理好健康狀況。（會否向場地索償？）對方有主動聯絡我，交畀屋企人處理。」

陳芷尤肉都赤

事發後振朗收到張繼聰、袁偉豪等人慰問，至於女友陳芷尤，他標住汗說：「佢有發訊息畀我，佢當時唔喺現場！（平安夜都唔同女友過？）各有各忙，我開始發現我鍾意男仔，多謝大家嘅愛。（男人腰部好重要喎！）係呀！好驚！希望唔好影響生育能力啦！」芷尤受訪時認為事件離譜，亦戥振朗心痛：「如果有小朋友經過，隨時搞出人命，佢好慘，呢排工作已經好忙好攰，平安夜仲整親。（點呵番佢？）唔使啦！最緊要個人冇大礙。」

文：影視組