謝安琪帶孖寶出巡 氹女食Mum Mum

謝安琪（Kay）今年三月為老公張繼聰誕下女兒張靖（Karina）後，簽約予麥浚龍公司旗下，早前已開始復工。一向以家庭為先的她幾忙都好，都會盡量抽時間照顧9個月大的Karina及大仔張瞻。由於張繼聰今年聖誕節要開工，所以Kay母兼父職，與媽咪、女傭及親友，帶着Karina同張瞻行街Shopping兼搵食。

張瞻化身小精靈

前日下午，頭戴白色畫家帽的Kay，先與母親及親友乘黑色房車前往馬鞍山行街，她全程將Karina孭在胸前，而Karina則戴兔仔帽，非常可愛。一行人先去商場的BB用品店購物，還跟店員有講有笑。當發現記者在場，她即友善揮手，然後去餐廳用膳。醫完肚，Kay到百貨公司買玩具，為仔女挑選禮物，最後睇中一架粉紅色BB單車送給囡囡。見Karina全程極為乖巧，沒有扭計。

昨日有讀者爆料，指Kay與家人現身大埔翠華餐廳為母親慶祝生日。當記者趕到現場，見Kay與仔女、母親、親友及女傭在餐廳內用膳。張瞻以紅、綠色小精靈造型示人，Karina亦穿上同一造型，兩人均戴聖誕帽，兄妹裝襯到絕。

謝安琪母親（右）昨日生日，帶埋仔女與女傭到餐廳慶生。	謝安琪親自餵囡囡食糊仔，非常溫馨。	張繼聰收工後趕回家，然後與妻兒睇戲歡度聖誕。

阿聰收工急慰妻

期間見Kay抱着Karina餵「糊仔」，不時甜笑氹囡囡進食，在旁的張瞻亦頻頻與妹妹玩，但見到媽咪照顧妹妹時，亦很乖地自己用餐。約一小時後，抱着囡囡的Kay結帳離開，見到記者即大方地企定任影。問到是否出外買禮物？她稱已經買了。問張瞻可有畫聖誕卡送給父母？他笑笑口搖頭，Kay即搞笑說：「依家呢啲新時代嘅小朋友好瀟灑o架！」然後一家人離開餐廳。

另外，雖然阿聰忙於工作，但收工後即回家會合老婆，並帶埋囝囝一齊睇電影。

前日謝安琪去商場買玩具，全程將囡囡孭在胸前。

放大圖片

文：音樂組　

攝：吳文聰、追蹤組