Tommy Hilfiger邀任形象大使 余文樂 獨‧潮‧帥
藝人余文樂向來被視為潮人代表，早前他獲美國時裝品牌Tommy Hilfiger睇中，成為品牌大中華區的首位本地形象大使，更專程飛到倫敦欣賞品牌的時裝騷。品牌創辦人兼設計師Tommy Hilfiger當日接受本報訪問，大談樂仔這位全新形象大使，大讚他是完美的Tommy Guy，與品牌風格不謀而合：「佢靚仔又時尚，係中國流行文化嘅中心，佢嘅風格好酷又精緻，佢明白時裝嘅力量，表達出獨特性以及打破常規嘅感覺。」
席上除了樂仔外，還有巴西足球員尼馬與英國賽車手咸美頓，Tommy指與不同界別的人物合作是品牌很重要的一環，亦是品牌不斷進步的秘訣。談到成功之道，縱橫時裝界近50年的他認為最重要是毋忘初心：「尤其係面對艱難時刻，最重要係忠於自己，追隨夢想，相信你所堅持。記得我喺1971年開咗第一間叫People's Place嘅時裝店，令我發現自己對設計嘅熱情，至今呢種感覺仍然冇變。」
