蘇韻姿愛白色聖誕 煙韌最着重情趣

來自加拿大的蘇韻姿（Andrea）隻身來港發展後，即將迎來第二個聖誕節，她憶起家鄉時說：「最唔慣係冇雪，雖然氣溫係零下幾十度，但都會同屋企人去戶外滑雪，其實我哋都好重視做冬，好傳統。（喺香港聖誕又點過？）今年蘇媽媽嚟香港同我過聖誕，準備一齊食自助餐。上年第一次喺香港過聖誕，因為一個人住，所以過節都諗住開工，最開心係同『熊家』家人劉丹同呂慧儀一齊，佢哋畀咗另一個家嘅感覺我，依家去街市有好多媽媽級觀眾認得我係『丹爺個女』。」

識朋友怕太主動

Andrea最近獲加戲份，與拍檔阮政峰發展感情線，她直言戀愛經驗不多，拍攝時比想像中更尷尬。問到現時單身，會否考慮結識一位港男男友，從而提升戀愛經驗及更易融入香港？她笑說：「緣分嘅嘢一直都搵緊，但係搵緊工作嘅緣分。因為自己畀人感覺開朗同隨性，加上鬼妹仔，都擔心令人誤會，所以識朋友時會顯得較被動。自己比較需要獨立空間，所以依家一個人生活都算習慣。（會係點嘅女朋友？）會習慣乜都攤出嚟講清講楚，不過好似聖誕節呢啲大節日會一早諗定點慶祝，考慮煮畀另一半食同準備小禮物，如果到特別日子都唔慶祝，會覺得生活少好多情趣！」

「竹升妹」下苦功讀劇本

Andrea修讀戲劇出身，相當享受演出工作，但身為「竹升妹」的她讀中文字有困難，每次收到劇本都要花時間寫拼音及做翻譯，她笑說：「呢一年中文進步最多，希望演出都可以進步，我會睇番演出，因為覺得自己仲好青澀，想搵到多啲改善嘅地方，最想改晒自己啲『竹升音』，同埋轉數可以快啲！最開心係後來滕麗名加入做大家姐，佢係我偶像之一，一直有睇佢做戲，好有戲味，最有得着係可以同佢做對手戲。」

即將踏入新一年，Andrea希望能早日習慣香港的生活節奏，以及挑戰更多不同角色，展現另一面。

文：影視組

攝：劉斌

場地：My Day