簡淑兒打風挑戰障礙賽頭髮滲泥水

簡淑兒（Jessica）、黃美棋及胡諾言早前到日本六日，參加國際性障礙賽，剛巧遇上颱風吹襲當地，三人在約12度的氣溫，加上風大雨大的情況下，依然堅持完成6K比賽，贏得獎牌。完成比賽後，工作人員即時遞上保暖氈及熱湯，讓他們取暖。

玩完周身震

首次參加障礙賽的Jessica說：「個比賽舉行兩日，我哋玩嗰日就係颱風啱啱打到嚟，玩完第二日個比賽已經取消咗。嗰日好辛苦，仲要遇上颱風，個難度係加倍。我哋一路跑，啲雨一路淋落嚟，打落塊面度真係好痛，有好多關我哋要趴喺地下，又要潛過啲泥水，成身濕晒又凍，玩完已經震晒，冇晒力！」

胡諾言（左起）、簡淑兒及黃美棋齊齊到日本參賽。

簡淑兒完成賽事凍到周身震，即刻披上保暖氈。

衣物全數報銷

Jessica表示當時由頭到腳遍布污泥，返酒店後用了個多小時清洗：「個頭洗咗3次都仲出緊泥水，啲衫褲鞋襪都唔要得，啲泥多到洗唔到！」她表示與美棋一同進行比賽時，沿途聽到不少壯男用日語及普通話為她們打氣。

雖然Jessica出發前只有半個月時間訓練，但她慶幸只有少少刮損，對成功完成賽事感到開心和滿足，希望將來有機會再參與其中。

文：影視組