莊思敏被攞着數藐爆絕交

由藝人夏雨、李司棋、米雪、關菊英等孭飛的無綫劇集《溏心風暴3》，播出以來內地網上點擊率億億聲，成績不俗。劇中演富家女的莊思敏，亦與眾前輩不乏對手戲，日前她接受本報訪問，講到角色看不起背景比她低的人，故經常藐嘴藐舌，為免令前輩們誤會，所以埋位前她也有預先跟眾人備案。

「有少數人憎我」

莊思敏透露完成幾個月拍攝後，基於太入戲關係，結果把角色帶入現實生活中：「間中都會拎出嚟用，對阿妹有，但多數用嚟對朋友，自己唔覺，係有朋友留意到我做乜成日藐人。（觀眾反應？）都好好，有少數人會憎我，但睇留言都知係憎我角色啫！」談到戲裏戲外均是有錢女，問現實中可有遇過黐飲黐食的朋友？莊思敏說：「讀書時有個同學成日話唔記得帶銀包，唔知點解，食親嘢會話多除少補，但永遠除漏自己，你問佢食唔食薯片，佢話唔食，之後買返嚟係佢食晒，後來有一次食飯，朋友好奇問張單幾錢，先發現原來佢又冇除自己嗰份，呢個人梗係慢慢疏遠，依家唔係朋友啦！」

屢失工作機會

被同學攞着數不特止，踏入社會工作後，亦曾因拿督女身份被人標籤，她說：「試過某啲工作嘅中介人，喺知道我身份後，同唔知嘅時候對我可以有兩種態度，好多機會無啦啦流失，佢哋會覺得我唔憂做，咁就唔好同人爭啦！唉！冇計，咪慢慢用工作態度令佢哋改觀番，係會唔開心，都持續咗一年，但我冇計損失咗幾多個工作。（阿妹莊思明有冇呢啲遭遇？）又冇，佢港姐出身，無綫大把有背景同有錢嘅人啦！」

莊思敏更被朋友戲言有如此家庭背景才找不到男友，她說：「咁我兩個妹又有男友嘅，點先？都唔關事，明明佢哋同我差唔多高，都搵到男友啦！（唔想要拿督女身份？）唔可以抹殺家人成就，反而同自己講要成功過爸爸。」

文：影視組

攝：秦健輝