黎瑞恩戴腰封錄歌自嘲似漏氣波

曾患抑鬱症及胰臟有兩個良性瘤的44歲前「寶麗金小花」黎瑞恩（小恩子），上周四入院接受微創手術，切除腹部約5、6cm的良性腫瘤後，僅留院四天即趕住出院。她昨日上載錄音咪相宣布復工：「感謝各位朋友嘅祝福，一切開始回復正常喇，令大家擔心真係過意唔去，我會努力工作答謝大家嘅支持。」錄音錄了五小時後，昨晚她「捱義氣」盛裝出席朋友的晚宴，手術前幸福肥的她，新照片見其下巴變尖，明顯瘦了一個碼，其拚搏精神雖然令人敬佩，但關心她的歌迷及好友都勸她要多休息。

聖誕陪囡囡赴韓

昨日小恩子受訪時被問到為何急住開工？她說：「冇時間喇，要錄音呀。」又多次強調身體「冇事」，不過錄音時發覺尚欠一點點中氣：「我好似『漏氣的波兒』咁，漏漏哋氣，不過錄音嗰時係OK嘅。（擔心運丹田氣影響傷口？）唔會，我戴咗腰封，用力時有嘢頂住，好似撳住個肚咁，醫生話個瘤唔係問題，放心啦，真係冇事喎。」

小恩子自言最大問題是睡眠不足，但留院期間接受了麻醉，結果睡了兩、三天，她笑說：「我發現夠瞓後變咗Bling Bling眼，對眼仲大過個瘤呀，即刻精神番晒。」談及瘦了一個圈時，她認為只是角度問題，還戲言：「真人冇瘦到，唔好咁誇張，後悔冇叫醫生捅多我兩刀抽埋脂添呀。（小心身體。）只要覺得自己冇病，我就冇病。」據知她近期工作不斷，除趕錄音外，屬廿四孝阿媽的她聖誕將如期陪女到韓國學跳舞。

前日返內地開工

主辦小恩子演唱會的負責人、星娛樂執行董事Tommy Chu表示，已勸小恩子多休息，只是她事業心重又心急，更踢爆她前日返內地工作：「佢堅持如期錄音，我都冇法，不過我呢幾日有同佢聯絡，發現佢講嘢由冇乜氣到依家有氣，相信佢冇事o架喇。」又指小恩子趕錄的是配合明年4月演唱會的HiFi碟，將收錄十首歌，其中兩首是新歌。

文：音樂組