陳敏之床戰唐文龍畀阿媽詐型
擁有42吋長腿的「索腿天后」陳敏之，同期兩部劇集分別床戰張兆輝與唐文龍，前晚她在劇中主動除剩黑Bra與唐文龍從睡房激戰到浴室！幸播映時老公不在身邊，敏之笑言：「同媽咪睇仲尷尬，點知媽咪睇完講咗句：『你實畀老爺奶奶鬧！』」
索媽陳敏之昨日與陳華鑫及林秀怡宣傳劇集《性在有情》，以聖誕造型在波波池大玩遊戲，敏之預告聖誕節會帶兒子雷子樂睇燈飾！她與唐文龍主演的劇集《溏心風暴3》，前晚播出她除剩喱士黑Bra床戰唐文龍，由睡房激戰到浴室，火辣香艷，挑戰電視尺度！敏之更透露在《性》劇中與張兆輝亦有大量床戲，但以溫馨搞笑為主。
「實畀老爺奶奶鬧」
問到前晚播映時有否與老公收看？敏之說：「佢約咗人冇睇，我係同媽咪睇嘅，反而仲尷尬，我仲用棉被冚住自己，點知媽咪睇完講咗句：『你實畀老爺奶奶鬧啦』！咁佢哋好開通，唔會鬧我嘅。（怕唔怕老公重溫？）唔知，佢未必，但我想佢避一避啦，始終係老公！我又唔會逼佢睇。」
在兩部劇集分別床戰張兆輝與唐文龍，敏之笑言無法比較：「好唔同，《溏心》係Heavy啲，都有朋友反映鍾意睇《溏心》，話近年少有呢啲刺激不倫戀，咁我自己都鍾意。（避過限奶令？）因為係需要呢啲情節，都有分手同鬧交，唔係衣着上嘅性感，今次係最大膽一次、亦係最痛心嘅一次演出，當時剛剛生完，係開心媽媽，都怕因為投入角色，情緒被拖入低潮，因為多內心戲爆發，好在返到屋企見到BB就開心晒，佢幫咗我好多！」
同老公事後檢討
敏之指兒子認得電視機中的她，很多時看到海報都會嗌媽媽，她說：「佢知媽媽係演戲嘅，大個啲就可能會打文龍，話佢蝦媽咪！我都好期待，覺得咁樣好Sweet！（有同老公預告性感？）冇講太多，因為會影響工作，我都會多顧忌，佢有叫我畀心機，仲會同我事後檢討。」
激戰人妻 要擺和頭酒！
藝人唐文龍早前不慎被舊式升降機夾傷手，昨日右手包上紗布的他出席新城電台訪問，文龍笑說像「熊掌」：「部升降機係上下開合，當我發現嗰陣已經太遲，鬆都鬆唔切手，夾傷掌心嘅韌帶，會影響到做運動。」
文龍於熱播劇集《溏心風暴3》中飾演的角色鄭立安（Nic）備受關注，與陳敏之激情連場，他說：「初頭都唔敢睇，因為飾演Nic係一個爭議性人物，好彩依家出嚟嘅反應都好好。」問到會否怕敏之老公生氣？他笑言要擺「和頭酒」：「工作啫，拍嗰場浴室戲我哋好凍，要不停沖熱水，拍咗幾個鐘，轉機位嗰陣都只係搵件袍鋪住。觀眾就睇得過癮，我哋就做得吃力。」
文：影視組