挑戰陳豪生夠3個陳智燊度期「造人」
無綫藝員陳智燊與太太宋熙年昨日在銅鑼灣出席孕婦營養產品活動。近期頻頻夫妻檔亮相的宋熙年笑說：「可能大家知道我哋好努力咁賺緊奶粉錢。好多女士怕有BB會影響工作，其實依家嘅女性講求工作、家庭平衡，我係好支持女仔早啲成家立室，因為真係好幸福，工作、家庭配合先至圓滿。」
講到「造人」進度，宋熙年笑指老公忙拍劇，要向劇組度期：「等佢拍完呢套劇就真係可以專心去『造人』。」陳智燊笑說：「我好佩服陳豪可以拍緊劇都有時間去『造人』。」問他會否挑戰陳豪生夠三個？宋熙年即說：「佢想o架，但我諗我冇陳茵媺咁強，不過如果生到三個我唔介意，呢啲要交畀上天，不過生咗第一個先啦！」