「莉亞公主」嘉莉菲莎生前曾在自傳爆出1977年拍首集《星戰》電影時，撻着已婚拍檔「漢蘇奴」夏里遜福，片中飾演嘉莉哥哥的「天行者」麥咸美近日竟追加驚爆當年他與嘉莉曾一度撻着，更親熱至「火箭發射程序啟動」，惟最後急急煞停！
嘉莉菲莎（Carrie Fisher）去年12月因心臟驟停離世，終年60歲，其遺作《星球大戰：最後絕地武士》（Star Wars: The Last Jedi，簡稱《星戰8》）近期上映，不少拍檔憶及跟她合作的往事。66歲老拍檔麥咸美（Mark Hamill）繼今年5月首爆兩人1977年拍《星球大戰》（Star Wars）時發展曖昧關係，近日受訪更詳細爆料！
麥咸美表示當年已明白到撻着工作夥伴並非好事，但最終仍搭上嘉莉：「嘉莉同我一撻即着，我記得有次，我肯定係酒精作怪，我哋傾有關接吻技巧。我同佢講：『我相信我係幾好嘅接吻對象，我喜歡女人主動多過自己主動。』然後佢就問：『你咩意思呀？』跟住我哋就好似一般後生仔女咁親熱！」但表示最終兩人決定叫停，未能「成事」，他帶笑說：「對我嚟講好不幸，因為火箭發射程序已經啟動。」又指最終兩人未有成為情侶，但多年來無論戲內戲外都是兄妹。
其實嘉莉去年曾在自傳中自爆1977年與當時已婚的夏里遜福（Harrison Ford）拍攝《星球大戰》期間戲假情真，並發生肉體關係，敢言的她更彈福伯床技一般，但就未曾爆出同年曾與麥咸美有「火花」！
此外，《星戰8》日前在首場首映開始前，在荷里活TCL中國劇院舉行儀式向嘉莉致敬，大會請來嘉莉胞弟托迪（Todd）為紀念牌匾揭幕。而美國太空總署（NASA）近日宣布將於《星戰8》本周在北美公映後，在國際太空站（ISS）播放給太空人觀賞。工作人員會將電影的數碼格式檔案放在手提電腦或投射器播放，今次已非首次在國際太空站舉行「首映」，ISS擁有大型電影圖書館，存放的電影大多講述外太空主題為主，包括《異形》（Alien）及《引力邊緣》（Gravity），ISS前年曾播放《火星任務》（The Martian）。
文：外娛組