陳敏之四重身份變鐵人媽咪

演床戲 老公睇到唔舒服

藝人陳敏之誕下兒子雷子樂後，坐滿月便為無綫現正播映的劇集《溏心風暴3》拍攝，她坦言覺得此劇值得接拍，故當時甘願一方面既要餵人奶湊仔，一方面又要捱更抵夜拍攝，真的是女鐵人。《溏3》今次有不少新加入成員，敏之亦是當中一位，她指飾演的角色「黃以愛」初期木口木面，是實幹型的太子女，但之後與有婦之夫唐文龍搭上，陷入三角戀，更為對方自殺，而劇中二人亦有多場激烈床上戲，敏之坦言是從影以來最激的一次。

最驚身形唔夠弗

問到做了母親後要接拍床上戲，會否有心理負擔？敏之說：「我只係驚身形唔靚，當時又要Keep fit，又要食多啲嘢保持健康餵人奶畀BB，我拍時都要着性感睡衣，不過唔係賣弄性感。（老公介意嗎？）劇情係真係需要咁，當然老公係唔太鍾意我拍呢啲鏡頭，睇到佢唔舒服，播嗰陣佢睇到咪睇，但我唔會專登叫佢睇，換轉係我都唔想睇。」敏之直認拍攝前沒有向老公備案，並說：「我係好快抽離到嗰啲人，唔使咁認真。」

放大圖片	陳敏之已預留時間與家人睇聖誕燈飾。	放大圖片

湊囝囝 我都唔算好怪獸

敏之的囝囝子樂就快1歲，她盡量減少工作陪伴他，珍惜母子相處時間，而這位「黐身媽咪」出席活動時，很多時都會帶囝囝同行，問到會否為兒子暫停拍劇，她即說：「少啲囉！我下年會開拍一套劇，可能要出埠，到時就要辛苦我媽咪或者老公帶佢嚟探我。」敏之當初生BB時，坦言不想做怪獸家長，問她現時是否控制得到？她笑說：「我都唔算好犀利，好多家長喺小朋友未夠1歲已經報好多學校，但我冇，1歲幾先會開始幫佢報Playgroup，都唔算好怪獸，但係全家人對小朋友都好緊張，始終係心肝寶貝，我覺得做媽咪係全世界最幸福嘅事，以前自己會好執着一啲嘢，依家睇得失都睇得好輕。」

陳敏之不用開工時，便與老公二人世界拍拖。	陳敏之與唐文龍於《溏3》有不少親熱戲。	陳敏之為爭取親子時間，有時出席活動都會抱仔同行。

今個聖誕節敏之不用開工，她表示會帶BB去看燈飾或開派對，至於會否帶囝囝出外旅行，她說：「等佢識行先，大啲先，我成日都期望佢變為我嘅朋友咁，大家可以傾心事，母子關係就好似情人一樣。老公成日都話我哋兩個好Sweet，呢啲開心，真係幾多錢都買唔到。」問敏之會否快些追個B女，她表示一切順其自然：「依家唔會住，個傷口復原晒先，等子樂開始返學先打算，我都想生個細妹陪佢。」

知名度助做生意

除了幕前工作外，敏之亦有做餅店生意，更愈開愈多分店，她指做生意可以擴闊視野，令多些人認識陳敏之的另一面，問會否全身投入做生意而退出幕前，她說：「唔會，知名度都好緊要，而且自己好鍾意演戲，情況許可下我都會繼續拍戲，不過會減產，一年拍一兩部。」

文：影視組

攝：劉智源

場地：又一城