正所謂「得人恩果千年記」，身家高達39億港元的荷里活巨星佐治古尼（George Clooney）最近被好友兼生意拍檔Rande Gerber爆料，成名後曾為報答14名「恩人」而每人送780萬港元！
美國前超模仙蒂歌羅馥（Cindy Crawford）的商人老公Rande，最近接受美國節目《Headliners》訪問時就爆古尼為報答「恩人」，有一次致電給14名好友並說：「在月曆記低2013年9月27日，所有人去我屋企食晚飯。」當14名男友人抵達其寓所時，餐桌上準備了每人一個黑色篋，Rande憶述：「古尼話：『大家聽住，我想你哋知道你哋對我同我嘅人生有幾重要，當我過嚟洛杉磯時，我瞓過你哋嘅梳化。實在好幸運我嘅人生中有你哋，而且如果冇你哋，根本冇今日嘅我！最重要就係當我哋仍喺度一齊，我要報答你哋，所以我想你哋打開個篋。』」
而其中一個「恩人」正是Rande，他續說：「當我哋打開，係100萬（美元，即約780萬港元）。我哋14個人，每人都有。我哋當時好震驚，就諗搞咩呀？之後古尼再話：『我知道我哋全部都受過苦，而你哋有部分仍然捱緊苦，你唔需要擔心你哋嘅子女，好似學費，亦唔需要擔心供樓。唔止係咁，我亦為所有人代交稅，所以呢啲錢全部係你哋嘅。』」
雖然古尼「派錢」是出自好意，但Rande當時表示拒收，他說：「我拉佢埋一邊同佢講絕對唔會收啲錢！」但古尼堅決要Rande收下，更表示如果他不接受，所有人都會冇，令Rande最終「焗收」，但他表示事後將全數捐作慈善。
文：外娛組