閻奕格披「嫁衣」開騷大膽唔打底
閻奕格前晚在九展開騷，穿白色「婚紗」的她笑言內裏「乜都唔着」，想起歌迷支持時更感動落淚。她邀得型男周柏豪做嘉賓，笑言兩人是多年網友，希望之後有更多合作機會。
歌手閻奕格（Janice）前晚在九展舉行《閻奕格我有我自己音樂會－香港站》，獲曾合作《風雲5D音樂劇》的謝天華、陳淑芬、馬榮成等捧場。她以白色通花裝束出場，笑言造型似婚紗：「上次開騷係上年一月嘅事，我等咗7年先出第一隻碟，今晚係正式做歌手嘅處女騷，好感動。」她重提之前患抑鬱症及內分泌失調，消失樂壇一段時間：「有人形容我前兩年係浪費，我前五年唱歌嘅路係好順，但其實係好危險，我失去過先會更努力爭取，多謝前幾年嘅低潮，令我知道苦後甘甜。」之後唱出一連串廣東歌《苦瓜》及《傾城》等。
男歌迷怕醜
之後嘉賓周柏豪出場，與Janice合唱《一事無成》。柏豪笑言與對方是認識多年的網友：「第一次見佢係喺頒獎禮，佢做表演嘉賓，唱得好好聽，所以我就記住佢個名，一直有留意佢啲作品。」Janice亦多謝柏豪抱病現身，之後柏豪扶她落台時笑言：「婚紗嘅嘢我有經驗。」換上黑色裝束的Janice再次上台，並邀請一名男歌迷上台伴舞，期間她主動拖男歌迷的手兼搭膊，但對方避開，Janice即笑言：「過嚟 啦。」引得觀眾大笑。當她唱《我》時忍不住落淚，最後以《讓我跟你走》作結尾。
Janice騷後在後台接受訪問，自爆白色「婚紗」裙很性感：「本身係有件底衫，但最後決定乜都唔着，喱士下面直接就係Bra。我未試過，冇諗過咁大膽上台。」
希望再次合作
講到在台上落淚，Janice表示：「因為我之前失去過，驚好少人記得我，又驚冇咁多人想聽我唱歌，所以多謝各位陪住我，就算歌迷三年前見到我病咗肥到七十五公斤，但都話要聽我唱歌，所以有佢哋喺度我就會唱。」她又稱與柏豪一見如故：「我哋都講咗好耐合作，但一直冇機會。（搵柏豪作歌畀你？）想呀，今日係第一步，之後希望有更多合作。」
文：音樂組
攝：秦健輝