周國賢沙聲開騷食蛋糕出事
歌手周國賢（Endy）一連三場演唱會前晚在麥花臣場館開鑼，邀得何韻詩擔任演唱會導演。11號生日的他表示演唱會就是觀眾送的生日禮物，但又對觀眾自嘲：「你慘啦！12月咁多騷，你睇正一個唱得最麻麻嘅！」其後他換上魚網衫，粉絲即大叫「好大隻」！
騷後受訪時，聲沙沙的Endy坦言緊張，睡得不好：「枕頭搞到我條頸郁唔到，要針灸，綵排嗰時以為冇事，就冇錫住把聲，點知開騷唱到一半已經有少少攰。」他特地為開騷忍口，生日都沒有飲酒，但自覺因吃了蛋糕而影響聲線。問會否打開聲針？他直言不敢：「好驚西藥，我連止痛藥都唔食，次次食西藥都頭痛。」談及與何韻詩合作，他表示勾起兩人12年前做舞台劇的回憶，並指對方多年來都扶持他。
