「神奇女俠」唔怕蝕底嘉玲「上圓.下滑」個個Friend
喺香港要搵到一個人人都畀面嘅藝人並唔多，仲要做到八面玲瓏，睇怕只有劉嘉玲一人。佢唔止好似碧咸太座Victoria咁做埋Designer，瓣瓣涉獵，連憂鬱沉着嘅梁朝偉都可以將冰山劈開，就知幾犀利，簡直係wonder woman！最令人欣賞嘅係佢嘅大智慧，大家都知佢嘅行山腳除咗周潤發、林青霞、鍾楚紅外，仲有陳泰銘，前年陳泰銘去行山，陪佢嗰個唔係關之琳（之之），而係劉嘉玲，之後之之就話：「其實我們不是分手，是離婚！」矛頭直指嘉玲。不過佢一於少理，清者自清，仲唔介意破冰，嚟一招四両撥千斤話可以約埋之之行山，化干戈為玉帛，佢啲Friend咪就係咁樣儲番嚟囉。
自知不足 遇強愈強
梁朝偉喺電影《一代宗師》飾演葉問，講出武者嘅三個境界，甚至係人生道理：「人生有三見，自知見自己；進退見天地，放下見眾生。」嘉玲女人51，走過半生歷盡「三見」，絕對不枉此生。佢出生蘇州市，1980年隨父母移居香港，初到貴境滿口鄉音，加上貧苦出身，一直畀人睇唔起，但係佢自知不足，廣東話九個音明知難學，但都好快學成。查實冇嘢難到佢，人生成功大滿貫全靠「圓」、「滑」兩字！人生上半場，都係面面俱「圓」去處理難關；去到下半場，已經「滑」過任何高山低谷，有幾大件事都好，對佢嚟講已經「滑」晒牙，一切都處之泰然，淡定有錢剩！
一個人如果只識見自己，便會陷入自我為中心嘅誤區，好容易作繭自縛。嘉玲好快竄紅，佢冇因為咁囂張跋扈，反而做人處世更謙虛，絕對冇扮巨星。依家有好多所謂網紅、KOL，呃到少少Like就狗眼看人低，佢哋就係被勝利一刻沖昏頭腦。一個Artist可唔可以紅一世係長途賽，嘉玲見盡幾百萬個人中途落車，點解佢仲可以坐頭等？只因為佢早已見天地，知道唔怕蝕底，夠豪氣先吃得開。Nuts哥聽過有朋友搵嘉玲Line Up生意，雖然明知被搵笨，但依然做到平衡令雙方舒服，為自己又好、為友情又好，佢都可以用強勁公關手腕達到雙贏。
無懼辛苦 出山拍劇
嘉玲呢個朵唔使自己出聲已經人人畀面，搞紅酒生意有好姊妹王菲力撐，又獲邀去盡國際級Fashion騷，難怪已經有人講世界級公關「西有Victoria，東有劉嘉玲」啦！就連梁朝偉都話佢精力無限，嘉玲日前接受訪問都話：「我一早已經知我唔係少奶奶命，我好享受工作！」
多年冇拍劇，但嘉玲近日毅然接拍改編張愛玲小說嘅內地劇《半生緣》飾演顧曼璐，佢話本來唔想接呢套劇，但佢心儀呢個角色，就算拍40集幾辛苦都冇有怕。你可以話佢賤骨頭攞苦嚟辛，但佢就係鍾意挑戰自己。相比張愛玲喺《紅樓夢魘》一書講過：「一恨鰣魚多刺，二恨海棠無香，三恨《紅樓夢》未完……」的確，嘉玲「三見」，比張愛玲嘅「三恨」幸福好多。
Nuts哥