盧巧音嗌悶造人不如做騷
過去四年過着人妻生活的盧巧音（Candy），今年終於「嗌悶」，決定跳出家門，今個月在旺角麥花臣場館開騷，Candy自知唱Live表現欠「穩定」，故近年以跑步來挑戰及鍛煉自己。結婚初期Candy曾經為「解悶」想生小朋友，最後老公Sammy卻「叫停」，認為她的健康比有下一代更重要。
闊別樂壇四年，人妻Candy重返舞台開騷，她半說笑指人妻生活有點悶：「都悶悶地呀，婚後專心幫老公嘅樂隊Kolor做幕後工作，依家Kolor好多嘢都穩定晒，放心佢哋自己搞。雖然我都享受師奶生活，但坐喺屋入面都會諗，好似有啲嘢未完成，有啲嘢唔甘心，跟住就同老公傾，應唔應該整啲嘢呢？」
高齡放棄生B
Candy稱起初沒想過開騷，反而老公會站在她角度去想，覺得應該做屬於自己的東西，她謂：「老公都感覺到我身痕啩，所以好多事夾夾埋埋一齊，促使我搞呢個演唱會。」
已擱置「造人大計」嗎？Candy坦言：「有段時間係有諗過生BB嘅，因為係冇乜嘢做，我哋呢行少蒲頭自然少人搵你做嘢，我諗，咁悶係咪有個小生命好啲呢？同老公傾咗，但佢話都係唔好，大家好多理想、夢想都未去追，點解唔照顧咗自己先呢？（高齡都係唔生嘅原因？）都係，好多人都叫生，講就係！但老公都知我身體唔係好健壯嘅，如果生BB，係需要一段好長時間去調理同復原。而屋企兩隻白兔又走咗，係時候過番二人世界，旅行都可以去耐啲，唔使心掛掛。」
跑步自我鍛煉
再次開演唱會，Candy沒特別想得甚麼回報：「我只係想唱好啲歌，以歌會友。」講到一星期練跑四日，Candy稱：「跑步係想試自己跑唔跑到，我好耐冇做運動，身體差，運動係對自己有幫助，但唔係為演唱會而做。（有時你畀人覺得唱Live唔穩定？）呢個我自己知嘅，所以咪暗地裏鍛煉自己，我唔係跑畀人睇，最主要係跑畀自己睇，話畀自己聽係做得到。」
這次在容納3,000人的場地開騷，是想開好個頭，下站邁向紅館嗎？Candy則覺得：「做好個頭係啱，但冇諗做好頭之後要點，我深信做好頭之後啲嘢就會慢慢嚟，無論個場係紅館或者邊度都好，我都會去唱嘅。」
文：音樂組
攝：劉智源
場地：HMV kafe
髮型：Matt Chiu@Xenter
化妝：Macy Chan
形象：Jo@Jo.MEH.AH