馬國明借戀情搶票 氣勢壓王浩信
台慶頒獎禮昨日公布視帝、視后及男、女配角提名名單，網民心目中呼聲最高的馬國明與首次提名視后的女友黃心穎於記者會上互撐為對方拉票，更表示會投對方一票，全程冧爆！而勁敵王浩信未有到場，看現場形勢，馬國明率先搶票成功！
《萬千星輝頒獎典禮2017》將於明年1月21日隆重舉行，昨日無綫開記者會率先公布視帝、視后及男女配角提名名單，今年視帝方面競爭較為激烈，本來以奪得新加坡「視帝」的王浩信呼聲最高，但突然殺出馬來西亞「視帝」苗僑偉及憑《降魔的》被網民熱捧的馬國明，形成三強局面。而袁偉豪及周柏豪亦憑《使徒行者2》首次角逐視帝獎項。反觀女主角方面則充滿變數，李佳芯於新加坡封后，但馬來西亞則輸畀宣萱，加上胡定欣、田蕊妮、鮑起靜等實力派，令視后之爭形成混戰局面。
昨日馬國明及黃心穎雙雙出席記者會，一班藝人落力為馬國明拉票之餘，一對情人亦不忘晒恩愛為對方拉票，而視帝另一大熱王浩信昨日沒到場，被馬國明率先搶票成功！心穎憑劇集《與諜同謀》首次角逐視后獎項，她直言被嚇親：「好Surprise！冇信心，希望下年繼續努力有好成績！」談到男友馬國明指會為她拉票，她笑指不需要，自己會為對方落力拉票：「佢機會大啲，佢係靠實力，我會畀我啲運氣佢！」她在台上拉票時頻頻被藝人們將戀情擺上枱，主持人區偉權問她會投票給誰？她說：「我投畀何遠東同……咩囉！」區偉權問何遠東會投給哪一個男主角？何遠東大叫：「馬國明！」搞到心穎尷尬傻笑。
唔抗拒情侶檔攞獎
被睇好大熱的馬國明在台上被主持問會否替心穎拉票？他笑言：「出年啦！出年《深宮計》啦！」說到心穎「升呢」爭視后，他今次不再「天然呆」，並揚言：「我一定支持佢，幫佢拉票，記得投票畀黃心穎啦！其實佢咁新，有得提名女主角都好叻，係好好鼓勵，有冇獎拎要睇運氣，當係一個騷，畀觀眾睇得開心。（諗過同心穎一齊拎獎？）咁又冇喎，如果有獎拎當然唔抗拒。」
談到視帝，馬國明說：「都係平常心，今年都幾難捉，好似王浩信、三哥苗僑偉、蕭正楠、陳展鵬，同埋我身邊嘅袁偉豪，佢Body好正！就算係男人都覺得吸引！」袁偉豪即笑說：「我唔係靠呢啲！」問到最大勁敵是否「新加坡視帝」王浩信？馬國明說：「浩信『盲俠』個角色好特別，亦睇到佢進步好大，由《EU超時任務》到《不懂撒嬌的女人》到盲俠一直進步。（對自己冇信心？）又唔係冇信心，係平常心。」
蔡思貝榮幸鬥鮑姐
至於袁偉豪則說：「自己應該係第一次入圍男主角，信心一般般，我睇好馬國明、王浩信同三哥，《使徒行者2》唔係有三哥就冇我哋呢班臥底出現，所以三哥角色好重要。」此外，蔡思貝憑《踩過界》獲視后提名，她直言十分開心，又指對手有鮑起靜，令她分外感榮幸，更期待公布最佳劇集的提名名單，覺得《踩過界》很有機會奪獎！
無綫高層杜之克受訪時表示，今年的投票依舊分為公眾、無綫員工及評審委員會投票，暫時只公布四大獎項提名，因今年獎項會有些變化，故留待之後啟動儀式記者會時會再公布。
文：影視組