楊怡前晚出席劇集《再創世紀》煞科宴放閃，坦言已Ready做媽媽的她，開始調理身體努力「造人」，又大讚老公羅仲謙朝朝4點起身送她開工，抵讚又抵錫！

郭晉安、楊怡、周麗淇、林文龍、袁偉豪、周柏豪、鄧佩儀、陳貝兒等前晚出席劇集《再創世紀》煞科宴，楊怡透露準備好「造人」，還放閃大讚好老公羅仲謙，她笑說：「其實一路都Ready，呢排日日都朝早四點起身，所以好攰要調理一下身體。（廣尋生仔秘方？）冇，反而身邊嘅朋友知我Ready生仔，介紹好多中醫畀我調理。（老公配合？）配合，佢好好，仲係好好嘅司機，呢個幾月日日都開咁早，佢朝朝4點鐘就起身車我返工，佢堅持到咁耐真係好有毅力同耐力，真係好抵讚。」

而郭晉安笑言與楊怡合作拍劇後要去整容，笑說：「因為拍得好開心，成日都笑，笑到多咗好多皺紋，個口都笑到大埋，聽日約咗整容醫生整容。未試過拍得咁開心，大家好多嘢講，呢啲可能就叫做合拍。」他計劃半年後才再拍劇，期間會學唱歌，但並非再闖樂壇，只希望自己進步。

柏豪指拍劇最難忘是與袁偉豪「朝夕相對」，他說：「見袁偉豪多過見我父母，一星期對足四、五日，變咗好似屋企人咁，佢好似我哥哥。」柏豪拍《使徒行者2》時買了一部洗衣機自己洗底褲，笑說：「今次為咗唔使洗底褲，租咗酒店。（老婆冇上嚟照顧你？）唔使，阻住做嘢。（冇時間陪老婆有冇詐型？）冇，身邊人都想我把握機會。」

文：影視組