周柏豪試車撞欄呃老婆「玩o架咋」
歌手周柏豪昨日落場試玩電動方程式賽車，他自爆今年犯太歲，太太Stephanie已為他求定平安符放在銀包，但試車時不慎撞向防撞欄，幸好人車均無大礙。他又表示每次出外練車，太太都叮囑他要小心，他則安慰太太：「我會同佢講『玩o架咋，係拍攝』。」
歌手周柏豪、連詩雅、藝人莊思敏、錢小豪、錢嘉樂與太太湯盈盈、吳家樂等昨日出席賽車活動。柏豪試玩電動方程式賽車，直呼夢想成真：「係人生好正嘅經驗，細個玩賽車遊戲就玩得多，發夢都冇諗過有咁嘅機會，可以喺香港嘅街道上玩賽車，好好玩，玩咗兩轉。（細個有冇諗住做賽車手？）細個乜都諗過，揸飛機、揸機械人，近幾年先開始接觸賽車，我有時會同朋友去珠海練車。」問到太太會否擔心﹖他坦言每次出門口，對方都叮囑他要小心：「我會同佢講『玩o架咋，係拍攝』，我玩乜都好節制。（太太有冇幫你求平安符﹖）年頭已經放咗喺我個銀包，因為我犯太歲，信唔信係一回事，最重要互相尊重，都係求個安心。」又自爆試車時發生輕微碰撞，但無大礙：「因為我想挑戰自己極限，轉第三個彎撞到防撞欄，好彩冇撞爛人哋架車，亦冇阻住條賽道，可以自己揸車返嚟做訪問。賽車手永遠都話『要自己揸架車返嚟，唔好畀人車返嚟』！」
莊思敏擺陣催桃花
莊思敏表示去年有落場玩房車賽，但大會今年取消房車賽故只能做觀眾：「下年有機會搞番，即時報名。（你手車好辣？）安全地辣，其實玩賽車嘅人揸車反而好小心，因為知道喺賽車場做錯一個小動作都會發生意外，所以會更有安全意識，希望香港可以有賽車場，就算地點偏僻啲都唔介意。」另外，她透露將拍攝新春玄學節目：「我會有第一手資料。（第一件事問姻緣？）梗係啦，我次次做節目都問，個個師傅都叫我等吓啦，我真係要擺陣。」
文：名人組