麥媽媽早知情：喺升降機度畀人夾硬抽水

麥明詩媽咪麥何小娟昨日回覆囡囡自揭被性侵一事時，語調平和：「我係知，但其實唔係啲人諗到咁恐怖，細路女唔識保護自己，事後佢有同我講，係好唔開心，性侵係好多層次，唔使擔心。（佢係受到較輕微嗰種性侵？）經一事長一智，細節唔講，佢自己都冇講。（冇畀人強姦？）以我所知唔係咁大件事，喺升降機度發生，佢講嘅係事實，畀人抽水，人哋夾硬嚟。（有冇叫佢報警？）正如佢所講喺內地發生，我知嘅時候佢已經返咗香港。」她指初初聽到女兒寫Post時感愕然，但看完後便明白：「好耐之前佢已經講想將學咗嘅法律知識去幫人，教人點去保護自己，呢個係佢抱負。」麥太又指女兒提到除褲只是舉例：「並冇發生在囡囡身上，但當然，作為一個女性成為性侵受害者一定不好過！」