蔡毅明湊仔不忘做好份工

時裝設計師蔡毅明與澳洲籍夫婿結婚一年多成功造人，剛於10月誕下兒子Max，一個月內由新手變熟手媽咪，她說：「好彩有陪月幫手！因為我餵人奶，所以初頭好忙，但依家已經適應。陪月話BB都算乖，一星期有幾晚可以瞓到第二朝先醒，唔太辛苦。」事業心重的她自爆入醫院生仔時，將電腦一併放入走佬袋：「我係開刀生，生完第二日已經喺醫院開電腦做嘢，依家喺屋企都會邊餵奶邊做嘢！雖然仲未返工，但喺『Home Office』跟同事保持聯絡，手機不離身！不過第時返工都唔會返太長，方便湊仔。」她又透露早前與老公拍拖出外慶祝結婚兩周年，離開BB四小時已不捨得！