杜德智自爆會「曳曳」
藝人杜德偉兄長兼星級健身教練杜德智月前去了台灣做全髖關節置換手術，如今已康復的他表示體能更勝從前，又大讚跟他健身的藝人當中，方力申最勤力，但試過「操過龍」以致過瘦！
杜德智（Orlando）自小熱愛運動，貴為星級健身教練的他笑言能夠將興趣和職業結合，是最高境界：「你有冇聽過份工係做運動就有人畀錢？」其實Orlando亦非常喜歡音樂，曾是歌手的他被問到健身與音樂帶給他的感受？他坦言：「或者我唔夠好啦，但我絕對冇抗拒再做藝人，音樂呢樣嘢不停喺我腦海中，我做歌手唔係冇咁成功，係未到我成功嗰個位。」他認為做藝人要配合多方面：「但做運動可以自己一個人，出咗身汗即刻可以感受到，吸納正能量。」
方力申「操過龍」
圈中有不少藝人都找過Orlando當教練，當中最令他讚賞的是方力申：「小方已經勁過我好多，佢真係好勤力，好多人都會運動，但邊個可以Keep到呢個習慣呢？」他大爆對方有次為拍攝而「操過龍」：「佢真係做足晒練習，影相嗰日佢直頭係過咗龍，我未見過人過龍o架！過龍咪太瘦囉，但係過咗一星期就靚仔到爆。」
拍拖冇得逼
Orlando亦自爆有「曳曳」的時候：「其實我都唔係全年食得咁健康，我都會食垃圾食物，例如花生、魷魚乾、炸豆腐，夜晚同人飲酒！」問到想不想找一個陪他「食花生」的女人？Orlando自言拍拖冇得逼：「感覺好緊要，因為我見到太多朋友太早結婚，我覺得最緊要係有個好嘅伴侶，Alone唔可怕，可以約朋友，Lonely係就算有個人喺你身邊，都可以好寂寞。Timing好緊要，撞到一個人可能佢好啱你，但唔可以夾硬嚟。」
文：專案組
攝：劉斌
場地：杜德智工作室