李佳芯爆男友冇力陳豪練「大包」抱走

藝員李佳芯(Ali)昨日宣傳劇集時踢爆男友陳炳銓力有不逮,無法一手抱起自己,反而拍檔陳豪有心有力:「但佢話我有啲分量!」陳豪直認當初睇小Ali,沒想過她有110磅,非常足秤!

藝人歐陽震華(Bobby)、陳豪、李佳芯和吳業坤等,昨日在秀茂坪一間女校宣傳無綫台慶劇《誇世代》。陳豪玩遊戲時大顯身手,受訪時笑指除了有運動細胞,亦有運動「大包」,平日當仔女是啞鈴:「兩隻手抱晒三個都試過!」而Ali被問到緋聞男友陳炳銓(Danny)有否試過一手抱起她,她即拉開話題:「反而之前試過畀陳豪一手抱起,其實我唔輕,都有110磅,有場佢抱完我,話我有啲分量!」陳豪直認睇小了Ali。再問到Danny是否要用雙手才可以抱起她?Ali說:「兩隻手係正常嘅!」此外,提到「六嬸」方逸華離世,陳豪表示最難忘是有次與生日的老婆陳茵媺行街時撞見方逸華,他說:「Say完個Hello我哋兩個就去食飯,點知之後方姐親自拎份禮物嚟送畀老婆,真係非常好人!」

吳業坤挺起胸膛引女(目及)

Bobby活動中被主持笑指是「大叔」,他認為「大叔」其實是尊稱:「吳秀波嗰啲就係『大叔』。返內地做嘢時,都有人叫我『歐陽老師』,我即刻話我唔係教書,但原來畀面你先叫你『老師』!」提到同劇拍檔張繼聰遭無綫封殺,他即大嘆「陰功」,並表示官司仍在進行中,不便多談。

至於吳業坤獲學生妹歡迎,他笑指入女校是每個男學生的夢想,又指讀書時鄰校剛好是女校:「我每次經過佢哋面前都會挺起胸膛,但始終一個女仔都識唔到。」

文:影視組