賈曉晨一臉慈愛地抱着囡囡「小飯兜」。
藝人賈曉晨（JJ）與「力王」樊少皇去年1月拉埋天窗，今年6月JJ宣布懷孕，昨日樊少皇在社交網貼出JJ充滿母愛抱着B女的照片，正式宣布囡囡出世，他寫道：「小飯兜歡迎你的到來，要疼媽咪哦，我愛你們。」JJ隨即轉發，更稱囡囡做「女漢子」，她寫道：「大飯兜，女汗（漢）子，終於見到你了」，一家三口幸福滿瀉，網友紛紛送上祝福。不過，JJ之後已經收起手機，專心餵奶！
鼻仔似爸爸
據JJ經理人透露，B女於11月18日出世，重6磅4安士，比預產期12月提早跟爹哋媽咪見面，令本來在內地開工的樊少皇臨時更改行程，趕返香港，陪入產房見證重要一刻，而JJ則由原定開刀生產，最終變成順產。據知，B女鼻仔似爸爸，有少少雙眼皮，嘴仔與下巴則似媽媽。
JJ現時已與B女返屋企休息，新手媽媽JJ正努力嘗試餵人奶，每三個鐘就要餵一次，為免分心，她連手機也收起，但亦感謝各界送上祝福！
「要扶牆走路」
其實JJ不只犧牲玩手機的時間，她在生B前兩天，身體已不舒服，她在微博寫道：「完蛋了，有點發燒。」翌日稍稍好轉，她便應另一大肚婆陳宛蔚High Tea之約，但JJ表示：「別看我故作輕鬆，其實要扶牆走路了，大飯兜（囡囡）可不是一般的大！」難怪樊少皇叮囑小飯兜「要疼媽咪哦」！
文：影視組
