農夫爭住供奉肥媽等發達
肥媽與黑妹李麗霞前晚舉行演唱會，邀得組合農夫做嘉賓，成員陸永表示經常被認錯是陸浩明（6號），又乘機「陷害」6號寸爆不理人！農夫又笑指6號契了肥媽後發達買樓，故笑言要供奉肥媽！
唱家班肥媽與黑妹李麗霞前晚在伊館舉行尾場《黑．媽媽笑住唱演唱會2017》，吸引葉童與丈夫到場支持。除了繼續有羅敏莊及囡囡陳禛、喬寶寶、李天翔等做嘉賓外，組合農夫亦現身大放笑彈。
陸永提到常常被認錯是另一藝人6號：「啲人見到我就問阿媽喺邊，當鄭裕玲死o架！6號話被人叫陸永嬲，大家睇清楚，究竟係我定佢值得嬲啲？」他又乘機「陷害」6號：「以後你哋叫我6號我會直接行過，你哋返去同人講『6號好寸o架！』」又謂6號契了肥媽後發達兼買樓，笑言契肥媽好過契觀音，C君即開玩笑指在家都是供奉肥媽，令人爆笑！
與黑妹各（手豆）萬五元利是
另外，C君踢爆肥媽在後台招呼嘉賓：「握完手之後我隻手係多咗舊現金。」肥媽笑言要畀車馬費。被C君大讚好氣的肥媽，解釋因要常常叫仔女返歸食飯，故練到咁好氣，陸永即笑說：「怪唔得頭先喺更衣室見到你先生唔係好聽到嘢。」
接着肥媽和黑妹落台與歌迷握手兼收利是，肥媽將利是攝在心口，並笑言：「親生仔都不如近身錢。」開騷期間，肥媽不時講有味笑話，又乘機讚老公是鷹，大笑說：「我講佢個鼻！」最後唱出名曲《友誼之光》，演唱會圓滿結束。
騷後肥媽與黑妹在後台受訪，黑妹感謝肥媽仗義相救開騷：「今次差唔多所有嘢係阿媽精心度出嚟，佢用心將屋企發生嘅嘢講畀大家聽，所以啲笑料先咁好笑。」二人指今次合作很好玩，可惜不夠時間而刪減了部分演出，肥媽說：「超時要罰錢，如果過咗12點要罰一場嘅錢，所以即刻走。」問到Cut歌會否可惜？黑妹說：「留番下次加落去。（遲啲再做過？）要睇吓肥媽啦！」講到（手豆）了不少利是，肥媽笑言二人各自（手豆）了約15,000元。
文：音樂組
攝：張福宏