張繼聰親子新體驗期待坐郵輪

藝人張繼聰昨日出席星夢郵輪最新成員「世界夢號」啟動禮活動，現場有一個巨大Lego郵輪模型，阿聰表示平時都會與囝囝一同砌模型，是很好的親子活動，笑言賺取了囝囝仰慕爸爸的感覺！阿聰又說早前闔家去泰國旅行：「經歷咗一次，個女一個鐘要食同瞓，而個仔就唔使食唔使瞓，不斷要玩嘅經歷！將來希望有機會去郵輪旅行！（係咪為咗遷就太太謝安琪，喺佢復出前去旅行？）佢係積極部署復出，最近又忙於做運動，已經煥然一新，但我唔會干涉佢復出嘅事。」

再被封金句王

現時無綫熱播的台慶劇《誇世代》，有份演出的張繼聰再被封為金句王，他指此劇的編劇是《幕後玩家》班底，笑言編劇團隊「有好嘢留畀佢」：「上星期嗰個看更Look，個個都話維肖維妙，但係其實喺6、7月戴冷帽拍戲好辛苦，啲汗癬到依家都未好番，不過成果咁好就唔記得晒辛苦啦！」

張繼聰與雲頂郵輪集團市場部高級副總裁李鳳霞出席「世界夢號」啟動禮。

張繼聰、謝安琪早前帶仔女去泰國旅行，有全新體驗。

食飽唔使做Gym

對於無綫推行「限奶令」，女藝人不再Sell性感作為賣點，早年在劇集《老表，你好hea！》中大玩震波猜枚的阿聰，令人留下深刻印象，他說新措施對他沒甚影響：「哎呀！依家都係睇陳豪同森美，其實《老表》之後，我應該成為咗香港電視史上黃金時段露得最多兩點同胴體嘅人，公司有咁嘅做法，要尊重，但係要平衡，唔通去沙灘着樽領咩！」問到可會擔心男藝人都要「收肌」？他說：「無綫觀眾層廣，要為年輕人建立良好觀念，男藝人都鬆一口氣嘅，可以食飽飯同唔使成日做Gym！」

文：影視組